Плетњов пристигна во Охрид

Во Москва светски познатиот пијанист изјави дека секому може да му се случи скандал, но во Охрид не сакаше да зборува за ситници

Вчера, околу 11 часот, светски познатиот пијанист и диригент Михаил Плетњов, заедно со Рускиот национален оркестар, пристигна на Охридскиот аеродром. Во изјавата, Плетњов не сакаше да коментира детали околу неговото апсење за педофилија во Тајланд, скандалот што е топ-тема неколку дена во светските и во македонските медиуми.

„Сега немаме време да зборуваме за скандалот, затоа што тоа се ситници. Концертот е тоа што е божествено. Скандалот ќе се реши порано или подоцна и тоа прашање повеќе не е интересно за коментари“, изјави Михаил Плетњов во Охрид.

Додека завчера во Москва, на прес-конференцијата која се одржа во попладневните часови во агенцијата РИА новости, Плетњов изјави: „Никој не е сигурен дека нема да му се случи скандал, па ни јас. Се' може да се исфабрикува. За среќа, се најдоа луѓе кои ме разбраа и кои ми помогнаа во Тајланд. Ќе се борам докрај да докажам дека сум невин и поради тоа и ќе се вратам во Тајланд“. Тој додаде и дека никогаш порано немал проблеми со правосудните органи во Тајланд, ниту, пак, во другите земји каде што престојувал.

„Јас сум музичар и за мене најголемо задоволство е да вежбам и да настапувам со оркестар. И понатаму ќе се трудам да им донесам задоволство на луѓето кои ја сакаат музиката, без оглед колку некои се обидуваат да ми подметнат нога. Веројатно има луѓе кои ми завидуваат, а на некои можеби им се допаѓа мојата работа“, додаде Плетњов пред руските новинари.

А во Охрид, Плетњов вети одличен концерт, каде што заедно со Рускиот национален оркестар и нашиот и светски пијанист Симон Трпчески свечено ќе се отвори јубилејното 50. „Охридско лето“. Пошироки информации за неговото апсење во Тајланд се очекува да даде на утрешната прес-конференција. (С.И.-Б.В.)