Пушењето се враќа на мала врата

Група пратеници повторно бараат со закон да се дозволат посебни простории за пушачите внатре во локалите

Александрија Стевковска



Поголемите кафеани со над 100 квадратни метри да одвојат посебна просторија за пушачите, во која вентилацијата на воздухот во просторот ќе овозможи доток на свеж воздух, а помалите до 100 квадратни метри да си се изјаснат дали сакаат да бидат пушачки или непушачки локали. Ова се бара со Предлог-законот за измени и дополнување на Законот за заштита од пушењето, изготвен од група опозициски пратеници кои кон средината на овој месец го поднесоа до Собранието, а за десетина дена се очекува да се најде на првично разгледување на собраниска седница, по што ќе се пресуди дали тој ќе оди во второ читање или „аут“.

Станува збор за Предлог-закон кој како барање беше најавен уште пролетоска, кога се' уште беше ладно, па секој бараше некој агол да се засолни и намира да си пуши, но дојдоа топли денови и проблемот со забрането пушење некако се подзаборави.

Сега кога фати ладно, кога седењето на терасите е само убаво сеќавање, на пушачите им текна повторно да го потегнат прашањето за измени во целосната забрана за пушење.

Во меѓувреме, низ кафеаните се пуши наголемо. Некаде скришум и нелегално, некаде легално, надвор пред локалите. Диво пушење се забележува и на терасите, кои првично требаше да бидат тргнати по 15 октомври, а сега нивниот опстанок е продолжен, но под услов да не се оградени. А на терен се прави се' и сешто. Па така, можат да се забележат убаво заштитени и затворени тераси со различни материјали, а најчесто најлон. И таму се пуши ли се пуши, па минувачите имаат впечаток дека во нивното маало се отворила мала фабрика која само чади.

Пратениците пушачи, пак, ќе чекаат собраниска разврска на својот предлог за видоизменување на забраната за пушење, сметајќи дека со целосната забрана за пушење тие се третираат како граѓани од втор ред.

„Тоа што се забранува пушењето и во кафетериите, дискоклубовите, ноќните барови, не значи дека граѓаните се заштитени од штетните влијанија. Имено, во домовите на граѓаните не е забрането пушење, а таму поголемиот дел од денот го поминуваат старите и снемоштени лица и малите деца. Како таму ќе се спречат штетните влијанија? Се разбира дека ова е оставено на свеста на пушачите и на нивниот однос спрема околината, па затоа со овој закон се предлага и сопствениците по свое сопствено убедување да одлучат дали нивниот објект ќе биде наменет за пушачи или непушачи. Сопственикот на објектот во кој ќе биде дозволено пушењето тоа ќе го означи на видно место, а непушачите нема да бидат принудени да го посетуваат тој објект и да бидат изложени на влијанија за кои тие сметаат дека се штетни“, стои во предлогот на групата пратеници Владо Бучковски, Горан Сугарески, Весна Бендевска, Томе Чинговски, Ѓорѓи Оровчанец и Менде Диневски.

Според нив, актуелните законски решенија за целосна забрана на пушењето ја влошија економската состојба во Македонија, со тоа што, поради драстично намалената посетеност на кафеаните, кафетериите, ноќните барови, дискоклубовите, пивниците и коцкарниците, сопствениците биле принудени да отпуштат дел од персоналот.

„Предлог-законот за изменување и дополнување на Законот за заштита од пушењето има цел да го коригира нееднаквиот третман на државните институции кон своите граѓани, доведувајќи го во прашање основното начело на почитување на правото на слободен избор“, стои во Предлогот.

Основата цел што треба да се постигне е да се променат одредбите од постојниот закон со чија примена се предизвикаа економски и социјални проблеми. „Правото на слободен избор, без притисок и наметнување туѓа волја е основно човеково право кое е загарантирано со Европската повелба за човекови права и Уставот на Македонија“, сметаат дел од пратениците.

Приспособувањето на објектите за пушачи се предлага да се изврши во рок од три месеци од денот на влегувањето во сила на овој закон.