Заеднички тим на Јадранската група во Авганистан

Заклучоците на Советот на министри на ЕУ за земјава, за Милошоски, се очекувани

Тамара Грнчароска



Петте земји од Јадранската повелба - Македонија, Хрватска, Албанија, Босна и Херцеговина и Црна Гора, како и Косово, како гостин, вчера под покровителство на САД разговараа за регионалната соработка, за обезбедувањето отворени врати на НАТО за замјите од регионот и за потребите на мисијата ИСАФ, во која сите земји имаат значителен придонес.

„Присуството во Авганистан не е доволно во воена и безбедносна форма, туку треба да се засили и цивилното присуство преку тренери и цивилни офицери“, рече министерот за надворешни работи, Милошоски, по средбата на министрите вчера во Скопје. Предавајќи го шестмесечното претседавање со Јадранската група, која сега се нарекува А-5, тој потенцираше дека таа дава добра можност во неа да се вклучат Србија и Косово и заеднички да се разговара за стабилноста и имиџот на регионот.

Црногорскиот министер за надворешни работи, Милан Рочан, како иден претседавач, рече дека ќе бидат најсреќни кога оваа група ќе се вика А-7. Рочан информираше дека се договориле освен своето поединечно учество во Авганистан, да формираат заеднички тим инструктори кои ќе бидат испратени таму.

Албанскиот министер Едмонд Хаџинасто во своето обраќање рече дека Тирана е задоволна од политиката на отворени врати на НАТО за земјите од регионот и ќе продолжи да ја поддржува Македонија за членство во НАТО „се' додека не ја видиме како полноправна членка“.

Прашан за заклучоците на Советот на министри на ЕУ, министерот за надворешни работи, Антонио Милошоски, оцени дека тие се очекувани. „Тие ги следат заклучоците и препораките на Европската комисија дека Македонија ги исполнува критериумите и е подготвена за почеток на преговорите“, изјави Милошоски. Тој побара Грција да има европски пристап кон проширувањето на ЕУ и кон Македонија.