Европскиот парламент и отвори фронт на Македонија

Фуере остро нападнат од владините претставници во Брисел. Македонија драматично го губи рејтингот во Унијата

Слободанка Јовановска


Европарламентарецот Јорго Шацимаркакис вчера покажа со прст кон премиерот Никола Груевски, изјавувајќи дека тој стои зад серијата напади на Влатко Ѓорчев кон евроамбасадорот Ерван Фуере.

Кавгата од Македонија вчера се пресели во Брисел откако Ѓорчев почна да удира по маса и да го навредува Фуере за време на Мешовитиот комитет на Македонија и ЕУ, претставувајќи го како прототип на советските амбасадори во Прага и во Софија во шеесеттите. Со овој настап Ѓорчев, како што најавил, сакал да ја демонстрира слободата на изразување во Македонија, бидејќи тие ставови за амбасадорот веќе ги изнел претходно во колумна во наш медиум.

„Ова е неприфатливо. Се' досега мислев дека е лош виц. Го осудувам силно овој инцидент. Но, ова е дел од серијата напади на член на парламент, кој е и претседавач со Комисија за одбрана и близок пријател на премиерот.

Тој, пак, не го осуди, туку го бранеше ова мислење, што, според мене, не може воопшто да се толерира. Фуере е тој што и' помогна на земјата да добие двапати препорака за преговори со ЕУ“, реагираше Шацимаркакис во првата јавна и директна манифестација дека ЕП е во конфликт со македонските власти.

Известувачот за Македонија, Зоран Талер, беше уште појасен.

„Се прашувам дали тие индивидуалци што учествуваат во вакви навредливи напади на Фуере и на други парламентарци се свесни што прават. Ако не се, господ ќе им помогне. Ако се, им прават голема штета на интересите и на иднината на Македонија“, порача тој. Во индивидуите што учествуваат во нападите тој препозна „неколку важни носители на одлуки“ порачувајќи дека се' уште има функционери во Брисел што се грижат за Македонија, па им порачува на нашите да пазат на зборовите што ги користат на релација со Унијата.

„Оваа дебата стана премногу лична. Амбасадорот Фуере ја претставува ЕУ, институциите на ЕУ и неговиот глас е глас на ЕУ. Апсолутно е неприфатливо да биде цел на вакви навредливи напади“, рече Талер. „Ние сме ЕУ, ние сме семејство на вредности и споредувањето на наш амбасадор со тие од бившиот Советски Сојуз не може да се прифати“, додаде Шацимаркакис.

За да ја ублажи ситуацијата, Александар Спасеновски од македонската страна на делегацијата уверуваше дека власта има позитивен став за Фуере и за неговата канцеларија и дека се' што битно постигнала земјата во последниве години, постигнала со негова помош.

„Неговата екселенција Фуере е личност што многу и' помага на Македонија. Неговите ставови и ангажман се причина, во принцип, да имаме позитивно мислење за неговата улога. Во негово време Македонија постигна повеќе важни цели и во таа смисла во име на членовите на македонскиот парламент, во име на мешовитиот комитет и на партијата ВМРО-ДПМНЕ, сакам да нагласам дека канцеларијата на ЕК во Македонија е многу позитивна и има и ќе има наша постојана поддршка“, рече Спасеновски.

Овие напади го ставија во втор план главниот политички настан деновиве, упадот во А1 телевизијата, за кој Фуере изјавил дека ЕУ ја поддржуваат УЈП во борбата против затајувањето данок, како и Владата во борбата против корупцијата, но треба да се гарантира слободата на изразување.

Тој, практично, го повтори ставот на Брисел дека е во ред да се има финансиски контроли и дека никој не е над тоа, но тоа не треба да биде параван за притисок врз медиуми.

Извори од ЕП вчера коментираа дека она што го виделе овие два дена на состанокот на Мешовитиот комитет е ароганција на власта и дека таа драматично го губи рејтингот во Брисел. Според нив, иако сакаат да се стават во втор план, случувањата во А1 му наштетиле на имиџот на земјата повеќе од кој било настан досега.

Иако од состанокот повторно беше побаран датум за преговори со Македонија, Шацимаркакис предупреди дека атмосферата за проширувањето станува се' потешка и ако го пропуштиме овој бран, никој нема да поведе ваков механизам за една земја, па ќе мора да ги чека другите.