Визниот режим на ЕУ стана и македонски
Македонија, неформално, го усвои визниот режим на ЕУ како сопствен. Владата донесе одлука со која се либерализира визниот режим кон сите држави што се наоѓаат на белата листа на ЕУ, но и за укинување на потреба од виза за сите држави од другата листа на ЕУ кои во својот национален пасош имаат валидна шенген-виза, соопшти вчера вицепремиерот на Владата задолжен за европски прашања, Ивица Боцевски. Со одлуката се дозволува сите граѓани на државите на кои за влез во ЕУ не им е потребна виза, во кои спаѓаат над 20 држави - поголемиот дел од земјите од Јужна Америка, САД, Канада, Австралија, Јапонија, Хрватска, Израел, Сингапур - да можат без виза да влезат и во Македонија, додека за државите од другата листа на ЕУ (на која се наоѓа и Македонија) валидна шенген-виза во валиден пасош ќе биде „валидна замена“ за македонска виза за влез во земјава. Бројката на такви држави е над сто и, како што информираше Боцевски, контролите што ги прави ЕУ пред да издаде сопствена виза се доволна гаранција за нашата земја да дозволи влез во државата. Одлуката ќе почне да се применува за неколку недели по завршувањето на сите административни и технички процедури околу тоа. Неодамна Владата донесе одлука со која се овозможува граѓаните од ЕУ и од останатите држави од шенген-зоната да влегуваат во Македонија само со лична карта. (Т.Г.) |
