Сомнежи за истрагата против Пауновски

„Пресудата во случајот против поранешниот министер за одбрана, Љубен Пауновски, се засновува врз скандалозен пропуст во истрагата. Ниту судот, ниту вештаците, ниту одбраната кои постапувале во кривичниот предмет не забележале дека на сите документи од службено приложениот договор имало печат за државна тајна. Но, овој факт не е констатиран, напротив, судот го употребил договорот како доказ, го читал, но не го дал на увид на обвинетите“.

Вакви сомнежи при водењето на постапката во предметот „Пауновски“ вчера на прес-конференција обелодени претседателката на „Транспарентност - нулта корупција“, Слаѓана Тасева, уверена дека случајот ќе одел во друга насока доколку надлежните имале поинаков поглед кон доказите. „Не велам дека ќе немало никаква одговорност за Пауновски, но неправилно се применило правото во постапката, а на тој начин се извртува вистината. Ова е само еден случај што кажува како не треба да се води борба против корупцијата. Битна е вистината и правната сигурност“, нагласи Тасева, според која институциите не треба да бегаат од своите надлежности и не треба да постапуваат спротивно на законите.

Таа најави дека секој трет петок во месецот ќе објавува по еден корупциски скандал со предзнакот верувале или не. Ова е дел од новиот проект на организацијата, која преку различни случаи ќе се обиде да ја разоткрие вистинската слика за работата на државните органи задолжени за борба против корупцијата и за неправилностите во антикорупциската борба. „Наш интерес е да владее правото, а во Македонија да се заштитени човековите права“.

Слаѓана Тасева потенцира дека борбата против корупцијата се' повеќе добива облик на фарса зад која се затскриваат корупцијата и учесниците во коруптивните активности. На овој начин, смета таа, се создава впечаток на борба против корупцијата и амбиент во кој вистинските вредности и резултати се заменети со фикција или со нешто што не постои. (К.Ч.)