Без злоупотреба на новинарите

Здружението на новинари на Македонија реагираше на обидот новинарите да бидат инволвирани и злоупотребени во настаните на скопското Кале.

„ЗНМ нема да дозволи политичките пресметки да се водат на грбот на новинарите. Ги повикуваме сите колеги да бидат внимателни и да не дозволат да бидат злоупотребени за политички интереси“, се вели во вчерашното соопштение од ЗНМ.

Оттаму информираат дека е неприфатливо политичките партии да етикетираат новинари. И додаваат, ако некој има забелешка за работата на новинарите, треба да се обрати до Советот на честа на Здружението, кој ќе се произнесе дали некој новинар со својата работа и однесување ги прекршил професионалните стандарди и новинарската етика.

ЗНМ апелира до сите новинари, кога следат вакви настани, без разлика дали се на работна задача или не, имаат обврска и должност да се однесуваат во согласност со законите и Кодексот на новинари. „Тие не смеат да бидат директни актери, туку набљудувачи и критичари на случувањата“, стои во соопштението од ЗНМ.

Здружението ги повикува новинарите да бидат одговорни кога известуваат за сензитивни теми, како што е случајот со Калето, и да не дозволат да бидат злоупотребени

за ширење национална и верска омраза. (П.Р.)