Во Мотовун победи „Бикова глава“

Белгискиот филм „Бикова глава“ на Мајкл Роскам ја освои главната награда „Пропелер“ на 14. Филмски фестивал во Мотовун, Хрватска (25 до 29 јули). Според жирито, станува збор за силно и живописно метафорично истражување на отуѓувањето на човекот и на неповратноста на човечката судбина. Меѓу 28 филма, кои беа во официјалната селекција беше и македонскиот „Панкот не е мртов“ на Владимир Блажевски.

Филмот на Блажевски годинава беше и во изборот за најдобар регионален филм, каде што од лани се доделува наградата „Бауер“. Во жирито за оваа награда од Македонија беше Теона Митевска, а наградата му припадна на српскиот „Тилва Рош“ на Никола Лежаиќ. За оваа приказна, во чиј фокус се младите и нивната безнадежност, жирито ќе рече дека одлично го отсликува тој психички и социјален вакуум на општеството во кое единствени гласови што се слушаат се гласовите на автодеструкцијата.

Наградата на критиката „Фипресци“, која во Мотовун се доделува 11. пат, ја доби мексиканскиот „Марта“ на Марселин Ислас Хернандез, кој зборува за стареењето и осаменоста. Додека наградата „Маверик“ која се доделува на неконвенционални автори со слободен дух и иновативност, му беше врачена на австрискиот контроверзен режисер и провокатор, Улрих Сеидл („Кучешки денови“, „Увоз-извоз“). Тој рече дека кога слушнал дека добива награда се плашел да не згрешил нешто, но сега ова признание го доживува како охрабрување и поттик да продолжи да биде бунтовен.

На годинешниот фестивал се прикажаа 90 филма во седум програмски селекции, а младата публика повторно навали и ги гледаше проекциите дури и на дожд. (С.У.)