Претходен број

5 ПРАШАЊА

Со избилдан рејтинг не се гради иднината

Љубе Бошкоски, независен кандидат за претседател

Билјана Јовановска


На митинзите често се повикувате на Вашето преговарачко искуство од 2001 година, со кое на Македонија ќе и' обезбедите побрз влез во НАТО и во ЕУ. Како мислите да го направите тоа?

Во политиката имам повеќе од 20 години искуство, бидејќи кога мојата ВМРО-ДПМНЕ беше опозиција, бев секретар за меѓународна соработка и ги остварував сите контакти со цела плејада тогашни политичари, кои беа фактори во Европа. Знаев да повлечам вистински политички потег, некогаш на моја штета, но никогаш на штета на граѓаните на Македонија.

Компромис за Македонија нема, бидејќи во четирите свети букви ВМРО е спомената Македонија. Но, како политичар кој треба да мисли за иднината на државата, како нејзин иден претседател, не смеам да бегам од одговорноста. Со својот авторитет морам да ги седнам лидерите на партиите и да им кажам да го остават својот избилдан рејтинг, бидејќи со рејтинг не се гради иднина на Македонија. Затоа ги прашувам нашите политичари кои создаваат перцепција за нерешавање на проблемот имаат ли алтернативни решенија за невлегување на Македонија во НАТО и во ЕУ. Најважно е да се ослободиме од оваа ова т.н. привремено име БЈРМ. Истовремено, ќе се залагам да се зачува македонскиот национален идентитет, да не се повреди Уставот, а да се дојде до членство во НАТО и во ЕУ. Тоа може да се случи во хармонизирана атмосфера. Доколку во првата година од мандатот не ја внесам Македонија во НАТО и не ги отворам преговорите со ЕУ, ќе си поднесам оставка.



Велите дека ВМРО-ДПМНЕ има еден претседателски кандидат, мислејќи на себе, меѓутоа лидерот на партијата, Никола Груевски, постојано повторува дека тоа е Иванов. Дали Груевски некогаш Ви ветил дека партијата ќе Ве поддржи за највисоката функција?

Да, Груевски ми вети доколку се појавам на конвенцијата и одржам еден говор во мој стил, дека сигурно ќе поминам, но јас му реков „тоа да го оставиш за други времиња и за понаивни политичари“. Имам двојно поголем стаж во партијата од актуелниот лидер, но, знаете, кога зборот во една држава станува казна и злосторство, тогаш почнуваат проблемите. Прво, раководството на партијата мора да си расчисти дали Иванов е кандидат на ВМРО-ДПМНЕ или не е. Едно знам, никој не може да го избрише со гумичка мојот стаж во политиката, ниту, пак, да го избрише обвинението од Хаг каде што стои: Љубе Бошковски, министер за внатрешни работи, член на ВМРО-ДПМНЕ од основање. Тоа го напишала Карла дел Понте и тоа се факти.

Некои голобрадести момчиња од мојата партија, велат, ми биле лути, а новодојдениот турист кој се' уште е нераздолжен во претходната партија бил револтиран. Сум ги навредувал. Па, ако некој не расчистил со идеологијата, а доаѓа да ти се меша во твојата партија, тоа е како падобранец да ти врши упад. Она момче од Кичево, кое сега е министер за надворешни работи, на митинзи ни кажува колку Иванов бил важен и силен интелектуалец. А, до вчера чукаа на моите врати, се сликаа со мене, и говореа дека сум најголемиот македонски патриот. Виновен ли сум што 90 отсто од нивното членство е со мене?



Како ќе соработувате како претседател со премиерот Груевски со кого се разликувате за суштествените прашања за иднината на државата?

Мислам дека ќе мора да дојдат во новоизградената резиденција и да преговараат со мене. Ќе ги седнам на маса и ќе им кажам да престанат да се поигруваат со судбината на два милиона граѓани, бидејќи немаат таков кредибилитет. Доколку не ја сфатат реалноста во која живееме, ќе направам напори да ги дисциплинирам и да ги разуверам дека биле во заблуда. Кога ќе ја сфатат заблудата, ќе побараат извинување, а јас како голем христијанин ќе им простам.



Имате ли притисок Вие лично и луѓето кои Ве поддржуваат?

Апсолутно, имаме невиден притисок. Почнувајќи од прислушувања, туркања со некакви автомобили кон нас од „алфите“ во време кога собиравме потписи, од запирање од страна на „алфите“, како што се случи во Куманово, кога на најбрутален начин вадеа долги цевки и ги вперуваа кон нас... Сега ова првпат го говорам, досега го премолчував заради имиџот на Македонија.



Вие сте уверен во победата, меѓутоа, доколку не се случи тоа, може ли да очекуваме Љубе Бошковски да формира нова партија?

Јас имам своја партија, го имам ВМРО-ДПМНЕ и засега немам таква намера, бидејќи не ми е ниту во потсвеста да изгубам на овие избори. Сигурен сум дека ќе ги добијам исто како што неколку дена пред пресудата во Хаг бев убеден дека ќе излезам од затворот. Имам некоја интуиција и вера. Сигурен сум во енергијата која ја добивам од луѓето на теренот, зашто јас не ги носам со 400 автобуси, како што го прави тоа власта.

Реваншизмот е влезен на голема врата, видете како се однесуваат спрема некои нашите браќа кои преминале во друга партија со иста идеолошка матрица. Се гледаат како непријатели. Од друга страна, обединуваат личности за да имаат некаква си коалиција од 20 политички партии, а кога ќе им го изброиш членството, едвај можат да соберат 20-ина илјади гласачи. Го прават овој циркус од 100 партии во власта, а всушност, апсолутно доминира раководството. Неколку луѓе од ВМРО-ДПМНЕ кои не заслужуваат да си играат со партијата.