Почнува судењето на дебарчаните што планираа напад врз воена база во САД
Адвокатите на обвинетите тврдат дека клиентите биле изманипулирани од информатори на ФБИ
Петтемина Албанци од Македонија кои минатата година беа уапсени во САД поради планирање напад врз воен комплекс во Џерси, денеска ќе седнат на обвинителната клупа. Обвинителството бара високи казни за терористите, укажувајќи дека целта на нападот била да се убијат многу американски војници, додека адвокатите на обвинетите ќе се обидат да докажат дека нивните клиенти биле изманипулирани од платени информатори на ФБИ.
„Ако заговорот беше спроведен, телата на американските припадници на вооружените сили ќе беа расфрлани низ полињата на воената база во Форт Дикс“, американските весници ги пренесуваат зборовите на Обвинителството.
 Обвинителството го гради случајот околу тајно снимените конверзации меѓу двајца сведоци, кои соработуваат со истрагата. Тие конверзации, како што посочуваат сведоците, ги откриваат „плановите за напад на ’Форт Дикс‘ и убиство на американски војници“, и вклучуваат „разговори за наводно оправдување на таквите напади вкоренети во радикалната идеологија на џихадот“. Меѓутоа, адвокатите на одбраната тврдат дека нивните клиенти немале намера да учествуваат во нападот, прикажувајќи ги како личности со кои лесно може да се манипулира и кои биле воведени во заговор од страна на платени информатори од ФБИ, кои креирале заговор од празни зборови и закани.
„Секој заговор што планира смрт и уништување треба да биде сфатен сериозно“, вели Брус Хофман, експерт за тероризам, кој предава на Универзитетот „Џорџтаун“ и кој го следи судскиот процес на таканаречените петмина од „Форт Дикс“. Меѓутоа, Хофман додава дека нема стереотипни „домашни“ терористи и дека секој случај треба да биде разгледуван посебно. „Предизвикувајќи го кредибилитетот на информаторите и поставената стапица се вообичаените стратегии на одбраната што се користат во други судски процеси за тероризам’, рече тој. Тоа се прашањата на кои поротниците ќе треба да ги добијат како одговор за време на судскиот процес, кој се очекува да трае неколку недели.
Во случајот за „Форт Дикс“, првично беа обвинети шестмина осомничени. Аргон Абдулаху (25) се изјасни за виновен за обвиненијата за заговор, признавајќи дека им дал оружје на тројца од обвинетите, кои биле илегални имигранти. Тој беше осуден на 20 месеци затвор. Против петтемина други обвинети се поднесени посериозни обвинителни акти за ковање заговор за убиство на војници. За ова дело ќе одговараат браќата Дритан (29), Шаин (27) и Елвир (24) Дука, Мохамед Шневер (23) и Сердар Татар (24). Браќата Дука и Шневер се од Чери Хил. Татар е поранешен жител на Чери Хил, кој живеел во Филаделфија кога тој и другите беа уапсени. Шневер е американски државјанин роден во Јордан. Татар, роден во Турција, е легален имигрант. Браќата Дука, етнички Албанци од Македонија, живеат во земјата илегално од нивното пристигнување како мали деца од Мексико, кон крајот на осумдесеттите. Апсењето на заговорниците што се случи во мај 2007 година, ја круниса 16-месечната истрага што почна откако вработен во продавницата „Сиркјут сити“ во Маунт Лорел ги контактираше властите во врска со „проблематичниот“ видеозапис од кого било побарано да ја копира на ДВД. Видеозаписот, кој ќе биде емитуван на судскиот процес, ги прикажува обвинетите на стрелиште во Поконос, како повикуваат на џихад или света војна, и извикуваат „Алах акбар“ („Господ е голем“). Во процесот ќе бидат презентирани и десетици записи снимени од двајца информатори на ФБИ, кои се спријателиле со обвинетите. Тие информатори, како што тврдат властите, учествувале во „тренинг сесии“ кои вклучувале воени игри во планински области и фарми околу јужен Џерси, пишуваат весниците во САД. (Г.А.) |
