Сервер: Македонците нема да исчезнат поради парче хартија

„Македонија, Македонци и македонски јазик постојат и нема да исчезнат поради неколку збора на парче хартија при евентуален договор во спорот околу името“, вели Даниел Сервер од Американскиот институт за мир во интервју за Гласот на Америка на македонски јазик.

Според него, и САД многумина ги именуваат поинаку, но тоа не влијае на идентитетот на земјата.

„Во мојот начин на размислување, ниту едно парче хартија не одредува дали постои Македонија, дали постојат Македонци, дали постои македонски јазик. Сите тие постојат и нема да исчезнат поради неколку збора на парче хартија. Мислам дека Македонците мора да имаат повеќе самодоверба“, истакнува Сервер.

Потпретседателот на Центарот за иновации во Американскиот институт за мир смета дека се работи за практично прашање. „Прашањето е кои приспособувања треба да се направат за да се задоволат Грците, кои без оглед дали сметате дека е праведно или не, имаат вето во однос на македонскиот влез во НАТО. Значи, т��а е практично прашање, а не идеолошко, односно што треба да сторите за да влезете во клубот“, истакнува Сервер.

Тој ги негира шпекулациите дека е дел од американски тим што работи на предлог за името што би бил доставен потоа до посредникот Нимиц. Притоа, смета дека Американците не извршиле доволно притисок врз Атина, но додава дека има причини за тоа, како што се традиционалното, долгогодишно пријателство со Грција и силното грчко лоби во САД. Сервер ги повикува Македонците и власта да бидат смирени во процесот на преговорите со Грција. (МИА)