Рударите ја пишуваат најубавата економска приказна
Вчера свечено беше пуштена во пробна работа новата фабрика на „Бучим“ за катоден бакар
Иван Бојаџиски
Штип - Македонските рудари имаат со што да се гордеат. За тоа доволно говорат резултатите што ги постигнаа во изминатите години. Ова беше една од главните поенти на вчерашната централна свеченост по повод Денот на рударите, што се одржа во рудникот за бакар „Бучим“ кај Радовиш.
„Над 8.000 македонски рудари во сто наши рудници ја испишуваат најубавата приказна во економијата на Македонија. Резултатите што ги остварија помеѓу двата рударски празника се импозантни и имаат значајно влијание во подобрува��е на нашата економска слика. Тие остваруваат една третина од вкупното индустриско производство, со што придонесоа да имаме зголемен раст на индустриското производството од девет проценти во последните месеци во државава, а во исто време растот на производството во нашето рударство е за импозантни десет проценти“, нагласи вицепремиерот и министер за финансии, Зоран Ставревски.
Вицепремиерот, заедно со министерот за економија, Ваљон Сараќини, и првите луѓе на радовишкиот рудник, Валери Барутскиј и Николајчо Николов, вчера свечено ја пуштија во пробна работа новата фабрика за катоден бакар.
„’Бучим‘ е водечки колектив во својата дејност, тоа е компанија во која на најидеален начин функционира еден одличен инвеститор, извонреден менаџерски тим и силно посветени и способни работници. ’Бучим‘ е рудник кој посветено ги остварува своите развојни планови и проекти и во тој однос овој рудник е пример за другите стопански субјекти во државата“, потенцира Ставревски.
Со новата фабрика овој рудник го зголемува своето производство за 2.000 тони бакар, односно вкупното негово производство се заокружува на 10.000 тони на годишно ниво. „Тука нема да застанеме, зашто во развојните проекции имаме планови за зголемување на производството на катоден бакар на 3.000 тони, во што ќе инвестираме онолку пари колку што ќе биде потребно“, рече Барутскиј.
За заменик-генералниот директор, Николајчо Николов, новиот капацитет има економски и нови еколошки позитивни димензии. „Со технологијата што ја имаме, еколошки ќе се зачува сливното подрачје на реката Брегалница. Повеќе во Тополничка и во Лакавичка Река нема да гледаме зелена боја на водата, а со тоа еколошки ќе се санира и целото Лакавичко Поле“, Потенцира Николов.
Министерот за економија, Ваљон Сараќини, истакна дека нашите рудници се наша гордост. „РЕК ’Битола‘ е главен снабдувач со јаглен за производство на електрична енергија. Рудниците за олово и цинк ’Саса‘, ’Злетово‘ и ’Тораница‘ се значајни производители на олово и цинк, а рудникот ’Бучим‘ со секоја измината година остварува се' поголеми производствени резултати. И ’Кнауф Радика‘ преставува столб на гипсените производи во Европа, што ни дава за право да бидеме горди на позитивните остварувања што ги даваат во нашата економија“, рече Сарачини.
Министерот за економија им врачи благодарници на десетина најдобри рудари од македонските рудници, како најдобри работници во своите средини. |
