Насловна

„Викиликс“: Референцата БЈРМ не била пречка за НАТО и за ЕУ

Во 2005 година на Грција не и' била проблематична интеграцијата на земјава со привременото име

Референцата БЈРМ не била пречка за НАТО и за ЕУ во 2005 година, стои во доверливиот документ на американската амбасада во Атина, кој го објави „Викиликс“. Документот открива дека пред шест години на Грција не и' била проблематична интеграцијата на земјава со референцата ФИРОМ. Иако еден месец пред одлуката на Европската комисија со која земјава го доби кандидатскиот статус за ЕУ официјална Атина целосно го отфрлила предлогот на медијаторот Нимиц, официјални претставници изјавиле дека грчката влада нема забелешки ако продолжи употребата на референцата ФИРОМ за да не се блокира патот на Македонија во евроатлантските интеграции. „Викиликс“ објави и дека поранешната американска амбасадорка во земјава, Џилијан Миловановиќ, верувала дека земјава ќе добие покана за НАТО.

Во депешите објавени на „Викиликс“, стои дека во октомври 2005 година тогашниот шеф на грчката дипломатија, Петрос Моливијатис, го отфрлил предлог-решението на Нимиц, чија основа била двојна формула, обвинувајќи го дека бил пристрасен кон Македонија. Во истиот документ стои и дека ако нема решение до 9 ноември, датум кога е објавен извештајот на Брисел за Македонија во 2005 година, тогаш клучно за Американците било Грција да нема приговори пристапниот процес и натаму да продолжи под привремената референца.

„Викиликс“ објави и што и' пишувала поранешната американска амбасадорка во земјава, Џилијан Миловановиќ, на Розмари ди Карло, помошничка на заменик-државниот секретар во Стејт департментот во 2006 година. „Нема изгледи дека Македонија следната година ќе ја добие поканата да ги почне преговорите за пристапување, иако лани во ноември доби кандидатски статус за ЕУ“, објави „Викиликс“ делови од депешата од 18 октомври 2006 година, кои Миловановиќ и' ги испратила на Ди Карло пред нејзината посета на Скопје. Во дописот таа наведува: „Владата ќе го добие извештајот за своето приближување кон ЕУ во ноември и веројатно тој извештај ќе забележи на сегашниот застој со ДУИ, слабите резултати во борбата со корупцијата и бавниот напредок во спроведувањето на судските реформи, како главни причини зошто преговорите нема да почнат следната година. Но, Македонија би можела да биде цврст кандидат за покана од НАТО на следниот самит за проширување. Владата се надева за позитивни критики на самитот во Рига, како признание за своите постигања и сигнал дека проширувањето на НАТО ќе биде тема на некој самит во 2008 година“.

Во врска со проблемот со името, Миловановиќ вели дека новата влада, која положила заклетва само два месеца претходно, ја повторила двојната формула како основа за понатамошни разговори со Грција за спорот за името и изразила подготвеност на таа основа да ги продолжи преговорите под покровителство на ОН, водени од Нимиц.

„На Владата да и' порачате дека мора да оствари широки консултации и да создаде консензус со ДУИ и со опозициските партии за клучните закони и за спроведувањето на реформите. Треба во практика да ја докаже посветеноста на спроведувањето на Рамковниот договор, во блиски консултации со опозицијата и со ДУИ“, посочува Миловановиќ во депешата објавена од „Викиликс“. (Ж.Х.З.)