Поглед

Политички игри со Тоше

Катерина Шекеровска

„Добре дојдовте во Крушево, родното место на Тоше Проески! Наместо пред меморијалниот споменик, поклонете се пред таблата на која пишува: одложено поради објективни причини: имотно-правни пречки. Се гледаме за две години!“

Вака некако би требало да изгледа споменикот на Тоше по најновата одлука на Собранието, која најпрво даде зелено светло за негова изградба, па пред истекот на рокот рече: пу, пу не важи! Во пет до дванаесет тие велат дека имаат проблем што се вика нерешени имотни права, а опозицијата тврди дека им недостасуваат финансии за негова изградба и тоа само 15.000 евра.

Не беше никаков проблем веднаш по трагичниот настан и загинувањето на Проески во Крушево на неговиот погреб да се нареди и да се слика целата актуелна власт. И никој сосила не ги натера оттаму да најават дека ќе градат споменик. Не беше ниту проблем премиерот да одржи маратонски говор на концертот што се одржа во чест на Тоше кога со свирежи беше испратен од сцената. Тогаш публиката убаво го потсети дека сцената преку која Тоше ја афирмираше Македонија на Балканот и во светот не е место за политичка пропаганда. Тоше стотина пати изјавуваше дека е аполитичен и дека не и' припаѓа на ниту една партија. Арно, ама, сега по неговата смрт секој си го препишува на своја страна и сака да ќари поени на неговото име.

Имотни спорови, финансии, меѓусебни препукувања, инаетења, оспорувања..., зарем никој во државава досега не сфати дека Тоше е многу поголем од сето тоа, дека не е мегдан за игри и дека во никој случај не го заслужува тоа.

Жално и трагично е да се злоупотребува неговото име во дневно-политички цели. Тоше сакаше се', само не нечесни игри и лицемерие. А токму тоа и му се случува.