Белгиското претседавање мала надеж за Македонија

Проширувањето на ЕУ кон Западен Балкан, повеќе по инерција, се најде на агендата на Белгија

Тамара Грнчароска


Со влада во заминување, со постојани политички турбуленции и етничка поларизираност, која се заканува со поделба на земјата, Белгија од вчера застана на чело на ЕУ. Иако ваквата состојба предизвика загриженост кај нејзините европски партнери и во европските институции за капацитетот на Белгија да го спроведе претседавањето, таа ги смири своите партнери најавувајќи дека нејзината улога ќе биде ограничена и оти голем дел од активностите ќе им ги препушти на централните институции на Унијата, меѓу кои и на претседателот на Советот на ЕУ, Херман ван Ромпуј.

И проширувањето на ЕУ кон Западен Балкан се најде меѓу приоритетите на Белгија, но повеќе како континуитет на белгиската поддршка на политиката за проширување на Унијата отколку што нешто конкретно може да се очекува на тоа поле во наредните шест месеци.

Премиерот на Белгија во заминување, Ив Летерм, за проширувањето како приоритет го повтори познатиот став на својата земја дека мора да се искористи историската можност за проширување и оти на сите држави кои сакаат интегрирање во ЕУ треба да им се обезбеди европска иднина.

Сепак, според Летерм, земјите мора да покажат напредок врз кој ќе се врши зачленувањето. „Белгија е свесна дека мора да се искористи историската можност за интеграција на земјите од Западен Балкан. Меѓутоа, претходно треба да се оцени дали копенхашките критериуми се исполнети и сали сите услови се реализирани за старт на преговори“, изјави Летерм, неколку дена пред неговата земја да го преземе претседавањето со ЕУ. Притоа тој истакна дека земјите од Западен Балкан ќе станат членки на ЕУ, но претходно мора да ги усогласат своите законодавства со европските.

За македонското зачленување парафразираниот став на Белгија е дека пред нерешениот спор за името немоќно е секое претседателство т.е. дека без решение за името Брисел не би можел да помогне да се деблокира преговарачкиот процес на земјава. „Јасно е дека се' уште постои спор со Грција и тоа треба да е реши“, порача Летерм.

Белгија на својата листа на приоритети за претседавањето ги наведува зацврстувањето на европските институции, предвидено со Лисабонскиот договор, стратегија за излез од економската криза, т.е. поголем економскиот раст потпомогнат од пакет мерки што би го зголемил надзор над финансиските пазари.

Воспоставување подобра економска координација меѓу европските држави, исто така е дел од економската програма на Белгија за шесте месеци од претседавањето, исто како и унапредувањето на социјалната кохезија и борбата против сиромаштијата, подобрување на здравството и пензиски реформи.

Заштитата на животната околина и борбата против климатските промени се дел од списокот работи кои Белгија ги стави на својата приоритетна листа, но, кои исто како и излезот од економската криза, повеќе се „наследени“ приоритети од нејзините претходници.

Меѓу приоритетите на Белгија се најдоа и надворешните односи. Белгија во таа насока сака да го иницира стартувањето на новата дипломатска служба на ЕУ, именувана како Европска надворешна акциона служба. Службата не би водела независна политика туку би примала налози од земјите-членки и би ги претворала во единствена заедничка политика.