Насловна

Нов случај на бруталноста на „тигрите“

Син на вработен во Општина Карпош пред 15 дена бил претепан од припадник на „тигрите”, по што со потрес на мозокот завршил во болница на инфузија. Ова го тврди градоначалникот на општината Карпош, Стевчо Јакимовски, кој вчера одржи прес-конференцијата по повод суровото убиство на едно момче, жител на оваа општина.

„Сакам да ги замолам претставниците на МВР и на власта да престанат да ни ги тепаат и да ги убиваат н��шите сограѓани. Го замолуваме премиерот, господинот Груевски, да престане да ни гради тениски игралишта и да најавува акваленди во Карпош, сами можеме да си го изградиме тоа, а она што го бараме ние од него и што е исклучиво негова надлежност, е да ни обезбеди мир, безбедност и сигурен живот“, вели Јакимовски.

Тој запраша како е можно, во случај на насилна смрт, какво што беше убиството на Мартин Нешковски, да не се вклучат истражен судија и обвинител, како е можно присутни колеги на полицаецот „тигар“ да не го пријават случајот во МВР, туку да го забошотуваат, за потоа МВР да речат дека во рок од 48 часа го откриле сторителот, во услови кога сами кажаа дека сам се пријавил. Вакво однесување на полицијата, истакна градоначалникот на Карпош, е можно само кога имаме партиска полиција, а не професионална, и праша дали тоа значи дека во иднина ќе градиме и партиско судство, партиски обвинители. „Припадниците на „тигрите”, вработените во МВР и во владата воопшто, сите се финансирани од парите на граѓаните, пред се', да не' чуваат, а не да не' убиваат по улица“, изјави Јакимовски. (Д.Т.)