Измамничка ќарила од инвеститор 45.000 евра
Петнаесетдневен притвор и' е одреден на скопјанката П.О. (27), бидејќи со измама успеала да ќари 45.000 евра. Според МВР, се' почнало кога П.О. му се јавила на бизнисменот А.З. од Скопје, кој веќе уплатил 1,5 милион денари (20 проценти од вкупната цена) за деловен простор на улицата "Џон Кенеди" во Чаир, сопственост на Јавното претпријатие за стопанисување со станбен и деловен простор (ЈПССДП). Измамничката се претставила како Славица, вработена во претпријатието, која може да му помогне во купувањето на објектот.
Побарала 45.000 евра за да ја забрза процедурата и се договориле парите да бидат исплатени на рати. Измамничката дури и му покажувала документи, за кои подоцна полицијата утврди дека биле фалсификат.
Во мај годинава, П.О. побарала од бизнисменот да ги уплати и последните 30.000 евра и дека објектот ќе биде негов, дека за себе ќе задржи само 8.000 евра, а другите пари ќе му ги врати. Но, откако ги зела парите, измамничката ја снемало.
Бизнисменот ја побарал на нејзиното работно место во ЈПССДП, но бил шокиран кога установил таму немало вработена со такво име. Случајот бил пријавен во полиција, при што била откриена измамничката. (Г.А.) |
