Насловна

СДСМ

Маневски ќе го унапреди Туфегџиќ

Опозициската СДСМ смета дека денешната седница на Судскиот совет е закажана итно за тајно да се направи избор на нови судии, во што со право на глас ќе учествува и министерот за правда во заминување Михајло Маневски.

„Дали е точно дека Маневски утре мора да издејствува унапредување на Владимир Туфегџиќ и негов избор во апелационен судија, поради сработеното во аферата ’Пајажина‘“, праша вчера потпретседателката на СДСМ, Ана Павловска-Данева.

„На Судскиот совет му е наредено да свика седница на која последен пат ќе присуствува и ќе учествува Маневски со право на глас. На таа седница ќе се избираат дури 13 нови судии, од кои тројца во Врховен суд. Зошто седницата на Судскиот совет за избор на толкав број судии се закажува среде лето, во период на колективен летен одмор во судството“, праша Данева.

Според СДСМ, ВМРО-ДПМНЕ преку Маневски сака да воведе кадровски решенија во судството и „да награди одредени лица за сработеното во предизборието“.

Од ВМРО-ДПМНЕ одг��ворија дека министерот за правда има право на еден глас само поради измените на Уставот во делот за Судски совет што ги донесе СДСМ, а за кои ВМРО-ДПМНЕ уште тогаш беше против.

„Лицемерството на СДСМ е, всушност, одлуката во 1996 година само за една вечер да се изберат 630 судии во сите судови во Македонија. Ваквиот избор тогаш не беше направен од самите судии, туку беше политички избор на подобни судии направен директно од пратениците во Собранието, каде што СДСМ имаше двотретинско мнозинство“, се наведува во соопштението од ВМРО-ДПМНЕ. (П.Р.)