Насловна

Само три нови ѕвезди на владиното небо

Груевски реши и овој пат да ги задржи околу себе најблиските соработници

Александра М. Митевска



Нема поголеми изненадувања меѓу имињата предложени за членови на новата влада на Никола Груевски. Во списокот, кој мандатарот го достави во Собранието во петокот доцна навечер, на една рака може да се избројат кандидатите за министри што досега не биле многу експонирани на политичката сцена. Најголемо изненадување е новиот министер за образование, 30-годишниот Панче Кралев, чие име се чуваше во тајност до последен миг, а кој досега воопшто не беше познат во јавноста. Претходно, како изненадување, беа пуштени и имињата на новите министри за надворешни работи - Никола Попоски и за економија - Ваљон Сарачини.

Составувајќи го третиот владин кабинет, втор во коалиција со ДУИ, Груевски реши и овој пат да ги задржи околу себе најблиските соработници, така што интервенциите што се направија се само козметички. Да не понудеше ДУИ неколку нови, но познати имиња за министри и да не се направеа некои ротации на ресорите, сликата на новата влада ќе беше речиси идентична со досегашната.

Миле Јанакиески, Елизабета Канческа-Милевска, Веле Самак и натаму ќе бидат дел од владата, наспроти процените дека Груевски ќе им се заблагодари на досегашната соработка бидејќи нивните имиња не се најдоа на пратеничките листи на предвремените избори. Но, отсега во најблиското опкружување на премиерот нема да бидат Михајло Маневски, Васко Наумовски и Зоран Коњановски, откако беше договорено ресорите правда, евроинтеграции и одбрана да и' припаднат на ДУИ, која за министри ги избра досегашниот градоначалник на Сарај, Блерим Беџети, долгогодишната пратеничка, Теута Арифи, и доскорешниот министер за економија, Фатмир Бесими. Откако Собранието ќе ја избере новата влада (тоа би требало да се случи најдоцна до крајот на јули, а се очекува да биде многу порано), на скалите во парламентот нема да се фотографира ниту Антонио Милошоски, кој од поодамна соопшти дека се повлекол од министерската функција на свое барање.

Изборите и коалицискиот договор ВМРО-ДПМНЕ - ДУИ резултираа со унапредување на Спиро Ристовски од заменик во министер за труд и социјала - ресор што досега им припаѓаше на интегративците. Кандидирањето на Абдулаким Адеми за министер за животна средина, пак, се смета за чекор назад за еден од најблиските соработници на Али Ахмети. Во изминатите три години Адеми беше вицепремиер за Рамковниот договор - позиција на која сега се враќа Муса Џафери, кој во периодот 2008-2011 година беше министер за локална самоуправа. Џафери беше вицепремиер за Рамковниот договор и во Владата на СДСМ (2002-2006).

Неочекувана беше и ротацијата на правникот Никола Тодоров од образование во Министерството за здравство, со кое досега раководеа само лекари.

Цртички од премиерската биографија

Во биографијата што старо-новиот премиер, Никола Груевски, ја достави во Собранието, меѓу другото, стои дека тој „има силна верба во Бога, а идеалот од кој се раководи во текот на својот живот е работење и исклучително посветена работа за доброто и просперитетот на својата земја“. Груевски навел и дека е лидер на ВМРО-ДПМНЕ од 2003 година, при што прецизирал дека станува збор за десноориентирана партија.