Учениците добија бесплатни пробни билети

На слободните има печати од ЈСП и од приватните превозници „Слобода превоз“ и „Мак експрес“

Учениците средношколци од прва и од втора година вчера на првиот училишен ден ги добија бесплатните пробни билети од ЈСП „Скопје“. На нив, како што беше најавено, има и печати од приватните превозници „Слобода превоз“ и „Мак експрес“, што значи дека учениците уште вчера можеа да користат бесплатен јавен превоз во кој било автобус на трите превознички претпријатија.

Александар Бошковиќ, директор на ЈСП, вели дека овие билети учениците ќе можат да ги користат до 1 октомври, кога ќе почнат да важат официјалните бесплатни билети на кои секој ученик на ќе има фотографија. Токму затоа до 15 септември класните раководители и директорите на училиштата треба да ги потпишат официјалните списоци со имињата на учениците што треба да добијат бесплатни билети.

Учениците за нив ќе добијат маркичка што ќе им важи од 1 октомври до 31 декември, кога завршува првото полугодие, а потоа и маркичка за второто полугодие со важност од 1 јануари до 10 јуни, кога завршува училишната година.

На учениците што живеат на оддалеченост до 2,5 километри од училиштата каде што учат не им следува бесплатен превоз. (Сн.К.)