Воспитувачките во градинките одбиваат да работат на црно

Воспитувачките и техничкиот персонал од градинките „Орце Николов“, „Мајски цвет“, „Распеана младост“ и „Пролет“ во Карпош сега одбиваат да работат на црно, поточно, да бидат работно ангажирани на нелегален начин. Ова вчера на прес-конференција го соопшти градоначалникот на Карпош, Стевче Јакимовски, а за проблемот зборуваа и директорките од четирите предучилишни установи. Министерството за финансии им забранило овие вработени да бидат пријавени и преку агенции за посредување при вработувањето, бидејќи така треба да им се плаќа стаж и социјално осигурување. Тоа значи дека тие и натаму треба да продолжат да работат на црно за 5.000 денари месечно.

„Дури и тие минимални плати во кои влегуваат и хранарина и превоз, Општината е принудена да им ги укине и од утре децата само ќе се згрижуваат, но нема да тече никаков воспитен процес“, рече Јакимовски потенцирајќи дека поради ова се заканува опасност градинките да останат без квалитетен персонал кој би се грижел за 2. 000 деца.

Првиот човек на Општината го оцени ваквиот однос како пресметка на централната со локалната власт и тоа, за жал, како што рече, преку најчувствителната категорија - децата. Тој уште еднаш потсети дека сите тие вработени се дојдени на испразнети работни места, пензионирани работници за кои се плаќале по 25.000 денари месечно. (Сн.К.)