Приклучок за вода го вознемири Зубовце

ГОСТИВАР - Во гостиварското село Зубовце за малку беше спречен инцидент во обид за две новоизградени куќи да се постави приклучок за вода. Над петнаесеттина униформирани полицајци беа присутни за да спречат немил настан. Жителите на Зубовце со жив штит не им дозволуваа на работниците на комуналното претпријатие на Општина Врапчиште да ја заврши задачата, се' додека инвеститорите не и' платат надоместок на Месната заедница „Зубовце“ во износ од 500 евра.

„Градоначалникот на Врапчиште е виновен за создадената тензија и за непријатната атмосфера“, тврди Жуко Филиповски, претседател на Месната заедница „Зубовце“. Според него, зубовчани со сопствени средства пред 35 години го изградиле водоводот. „И сите што сакале да се приклучат, плаќале приклучок. Пред некој ден платија и сопствениците на стопанските објекти, како и зубовчани, кои годинава и пред тоа граделе нови куќи“, додава Филиповски.

Градоначалникот на Врапчиште, Бајрам Кадрија, ги отфрла како неосновани обвинувањата на претседателот на Месната заедница. „Со законот од 2005 година месните заедници не се правно лице и не располагаат со жиро-сметки. Советот на Врапчиште донесе одлука на месните заедници и на комуналното претпријатие за секој приклучок да им плаќа 1.000 денари, а не 500 евра“, објасни Кадрија. (К.К.)