Шутот за три ја донесе првата победа над Австрија
Кошаркарската репрезентација до 20 години успешно стартуваше на ЕП, но мора да поработи на колективната игра
Наум Котевски
Посакуваа победа македонските репрезентативци до 20 години на стартот од ЕП во „Борис Трајковски“ како неопходно ослободување од оковите на притисокот и успеаја да дојдат до неа - ја совладаа Австрија со 78:70.
Во овој прв натпревар на површина излегоа сите добри и лоши страни на тимот за кои селекторот Емил Рајковиќ зборуваше пред мечот:„Дефицитарни сме на местото плеј и центар, а имаме добар шут за три“, кажа во таа прилика Рајковиќ.
И не требаше многу време да ни стане јасно дека е во право. Без класичен разигрувач, но со бековите кои знаат да погодат од линијата за три, Македонија полека ја градеше предноста. Предводени од најефикасниот Симоновски (18 коша) младите надежи постигнаа шест тројки само во првите 10 минути (пет беа на Симоновски), па по првата четвртина имаа опиплива предност од 22:14. До полувремето додадоа уште два поена. Во третата четвртина имаше пад во реализацијата - постигнавме само 12 коша, но добро функционираше одбраната поради што Австријците постигнаа само девет. Во нападот беше лошо. Инертна игра со малку блокови и отварања. На неа посочи и Петрушев, кога по еден очаен напад во втората четвртина беше изваден од игра. Го обвини Рајковиќ дека многу го мачи баскетот, како што топлината во салата ги мачеше гледачите (очигледно климата не влегла во дилот меѓу КФМ и претпријатието „Борис Трајковски), а овој со право му врати: „Што да правам ништо не се случува“.
Такви периоди во играта против Бугарија и Унгарија не треба да има. Како што не треба да биде примарен индивидуализмот во еден ваков колективен спорт, иако станува збор за млади кошаркари кои ја користат секоја шанса да се докажат. Подиректно: „Симоновски дај му ја на Апцев кога овој е сам во рекет, не шутирај за три!“.
Тоа индивидуално практицирање баскет за малку ќе донесеше сензационален пресврт. Оние 64:47 во 35. минута се претворија во 65:56, за малку потоа да станата загрижувачки 68:65. Сепак, забививањето на Апцев по една контра навести убав крај.
Македонија - Австрија 78:70
(22:14, 20:18, 12:9, 29:24)
Сала: „Борис Трајковски“, гледачи: 1.000, судии: Тауринмо (Италија), Јанач (Чешка), Додс (Шкотска)
Македонија: Тодоров, Диковски 2, Симоновски 19, Петрушев 8, Апцев 10, Манев, Димчевски 18, Брчков 10, Крстевски, Петров, Талевски, Нанчевски 11.
Австрија: Сеилем 6, Шаф 4, Грејмајстер, Јаниш 5, Ленегер 18, Махалбашиќ 13, Оберман 3, Шарц 11, Ваис, Чебиц 4, Хасенбургер, Хојбергер 6.
Резултати
Група А: Португалија - Грузија 78:75, Шведска - Луксембург 91:59
Група Б: Финска - Полска 65:67, Норвешка - В.Британија 71:59
Група Ц: Чешка - Романија 79:74, Холандија - Швајцарија 91:56
Група Д: Унгарија - Бугарија 81:75, Австрија - Македонија 70:78
Викендов на програмата: Сабота: Полска - Норвешка (14,15 часот), Бугарија - Австрија (14,15), В.Британија - Финска (16,30), Швајцарија - Чешка (16,30), Грузија - Луксембург (18,45), Романија - Холандија (18,45), Португалија - Словачка (21), Македонија - Унгарија (21)
Недела: Шведска - Португалија (17,45), Словачка - Грузија (20) |
