Кабир Беди

Сандокан прогласен за италијански витез

Легендарниот индиски актер Кабир Беди, кој се прослави со улогата на Сандокан, неодамна во Мумбаи е прогласен за витез на Република Италија. Највисокото цивилно признание на овој 64-годишен актер му е доделено за неговиот придонес за воспоставување мост меѓу индиската и италијанската култура.

Серијата, која е заснована на романот на Емилио Салгари, прикажана е во 1976 година, а потоа репризирана многу пати, што го направи пиратот Сандокан еден од најпопуларните телевизиски ликови.

Инаку, Беди во својата кариера има снимено повеќе од 60 филма, играше и со Роџер Мур во филмот „Октопуси“ од серијалот за Џемс Бонд, но никогаш не го повтори успехот што му го донесе Сандокан.

„Ова е признание за животно дело и многу сум горд поради тоа, како и поради фактот што Италија не ме заборавила“, изјавил Кабир Беди.