Нацрт на ЛЕАП 2 на увид на граѓаните

Нацртот на Локалниот еколошки акционен план ЛЕАП 2 е на увид на сите заинтересирани граѓани и стручни лица, кои можат да го видат на официјалната интернет-страница на Град Скопје www.skopje.gov.mk. Станува збор за документ во кој се поместени анализи на актуелните состојби со медиумите и областите на животната средина на територијата на Скопје, како и мерки и активности со конкретни рокови за решавање на проблемите со загадувањето на средината.

Градот ги повикува граѓаните своите мислења, забелешки и предлози за ЛЕАП 2 да ги доставуваат на адресата [email protected] најдоцна до 22 јуни. Тогаш во периодот од 12 до 14 часот ќе се одржи и јавна расправа за овој стратегиски документ кога граѓаните ќе можат сами да учествуваат во расправата и да го дадат своето мислење.

На јавната расправа ќе присуствуваат и претставници од десетте скопски општини, од јавните градски претпријатија, невладините организации и стручната јавност. Градот ќе ги разгледа сите забелешки и предлози од граѓаните и ќе ги вклучи во Предлогот на ЛЕАП 2, кој во јули ќе се најде пред градските советници. (Сн.К.)