Студентски протест во Прилеп

Им ветувале студирање без партиципација, а сега по
100 евра за семестар

ПРИЛЕП - Триесетина бруцоши на дисперзираните студии на програмата „Производство и преработка на тутун“ при Земјоделскиот факултет во Скопје, кои годинава првпат се отворени во Прилеп, вчера протестираа пред Институтот за тутун. Тие се револтирани зашто им била побарана партиципација од 100 евра за семестар за државна квота. Тврдат дека долго време биле емитувани медиумски пропагандни пораки дека уписот на овие студии во државна квота е без партиципација. Потенцијалните бруцоши се чувствуваат изневерени и тврдат дека се подготвени да ги повлечат документите и да паузираат една студиска година во знак на револт поради измамите, кои, велат тие, потекнуваат од Земјоделскиот факултет.

„На секои половина час на сите телевизии и радиостаници имаше реклами дека во Прилеп има дисперзирани студии на Земјоделскиот факултет без партиципација. Дојдовме и конкуриравме знаејќи дека е така. Но, кога дојдовме вчера за да се запишеме во последен момент ни кажаа дека треба да платиме 100 евра, значи, може да им текне да побараат да се плати и 200 евра. Сите се незадоволни и најверојатно нема да се запишат, бидејќи пари немаат. Сите се согласуваме да ги повлечеме документите и да се запишеме на друг факултет затоа што овде има измама“, велат Драгана Петреска, Раде Ристески и Благојче Мирески.

Деканот на Земјоделскиот факултет, Драган Димитриевски, во телефонскиот разговор ги демантираше овие наводи на студентите. Тој тврди дека конкурсот бил објавен во два дневни весника и на огласната табла на факултетот и во него прецизно била наведена одлуката на Ректоратот и на Сенатот на Универзитетот „Св. Кирил и Методиј“ оти студирањето е со партиципација од 100 евра за семестар.

„Факултетот не може да ги прекршува одлуките што ги донеле Ректоратот и Сенатот. Незадоволните студенти можат таму да се обратат. Ако, пак, студентите се отпишат од факултетот, тогаш на третиот конкурс на 16 септември ќе има објави за упис за толку места колку што ќе останат слободни од предвидените 30 студенти за оваа програма во Прилеп“, вели Димитриевски. (Мн.Т.)