Дуќанџиите сакаат слободен пристап во чаршијата

Прилеп - Дваесетина дуќанџии од Старата прилепска чаршија и вчера го блокираа влезот во кернето кај бочварите, во знак на револт зашто, како што велат, локалната самоуправа не исполнила ништо од ветеното во изминативе десетина дена.

„Беше договорено да нема физичка бариера, да биде слободно движењето на потрошувачите, а и за дотур на стока од 20 часот до 6 часот. Но, влезот пак е блокиран, движењето е ограничено и намален е прометот на дуќанџиите“, вели Кире Трпчески од Регионалната занаетчиска комора, која го поддржа протестот.

Дел од дуќанџиите одбиваа да говорат јавно зошто, како што тврдат, им биле вршени силни притисоци од одделни лица за да се откажат од протестот и од нивното барање.

„Не сакам да зборувам јавно, зашто ми се закануваше едно од лицата од обезбедувањето дека ако продолжам да протестирам, ќе ми го запалат дуќанот и ќе ме нападнат физички. Ако продолжиме и натаму со нашите барања, ни рекоа дека секој ден ќе имаме инспекциски контроли“, ни изјави еден од дуќанџиите, кој заканите при првиот протест ги пријавил во прилепската полиција.

„Никој со возило не сака да помине во оваа улица и да плаќа по 10 денари за секое влегување. Муштериите едноставно го менуваат правецот, а нам ни се намалува заработувачката. Од друга страна, и доставувачите на стока одбиваат веќе да плаќаат, едноставно сите реагираат, а локалната самоуправа нема слух за нашите барања“, велат дуќанџиите.

Според информациите од локалната самоуправа, исполнети се сите барања на дуќанџиите. Остварени биле бројни средби со сите дуќанџии поединечно, а биле утврдени сите проблеми и решенија на два состанока.

„Според тоа, нема причина за никакви реакции на дуќанџиите, иако нивно демократско право е да протестираат. Но, обвинувањата дека им е намален прометот поради оваа новина, не се основани. Рампата е демонтирана и најдено е друго техничко решение за контрола на сообраќајот, со ниски, флексибилни паркинг-бариери со кои се овозможува контрола на влезот и излезот“, вели Бранко Нешкоски, директор на ЈП за просторни и урбанистички планови. Тој ги демантира и обвинувањата на дуќанџиите за наводни закани.

„Ниту некому сме му се заканувале ниту има основа за такво нешто. Оваа новина ја спроведуваме за да има ред во Старата чаршија, за да нема веќе безредие. Ако сакаме европски град, треба примена на европски норми“, категоричен е Нешкоски.

Дуќанџиите се категорични дека нема да ги прекинат протестите се' до остварување на барањето за повлекување на физичките бариери во овој дел од Старата чаршија. (Мн.Т.)