Советниците бараат отчет за индустриската зона „Жабени“

Проектот „Жабени“ беше главниот адут на владејачката партија во трите последни изборни циклуси во Битола

БИТОЛА - Зошто не се јави никој на аукцијата за купување земјиште во индустриската зона „Жабени“ крај Битола? Прави ли некој простор земјиштето да се раздава со непосредна спогодба во четири очи? Ќе понесе ли некој одговорност за потрошените пари досега?

На овие и уште на куп други прашања битолската јавност бара одговор од власта во Битола откако на долгоочекуваната јавна електронска аукција во јули годинава за продажба на земјиштето не се јави ниту еден заинтересиран инвеститор. Проектот „Жабени“ беше главен адут на партијата на власт во трите последни изборни циклуси во Битола, особено поради ветувањата дека граѓаните економски ќе се релаксираат со можноста за вработувања. Токму тоа силно ја мотивира опозицијата да бара отчет од локалната самоуправа за сработеното и оствареното. Дотолку повеќе што политичарите од власта најавуваа инвеститори од повеќе европски земји, па дури имаше и такви најави дека бизнисмени од Солун пројавиле интерес да ја закупат целата зона.

„По првото јавно наддавање кое имаше неславен резултат, отидовте со второ. Што се смени за еден месец, па објавивте и второ наддавање во август. Зошто на наддавањето издавате земјиште за градење деловен простор, а не за она за што е изворна намена на зоната и за што самото име кажува – индустрија“. Ова беа прашањата на советникот на СДСМ, Златко Ќурчивски.

Градоначалникот на Битола, Владимир Талески, одговорноста за неуспешноста на јавната електронска аукција што ја организираше Министерството за транспорт и врски во најголем дел ја префрли врз грбот на државната администрација.

,,Службата што го објави тендерот првиот пат направи техничка грешка. Ставија цена за продажба на парцелите што не беше реалната според Законот, ставија друга цена како да се работи за земјиште во центарот на градот. Се јавивме, но не сакаа да го прекинат процесот. Во меѓувреме, имаше луѓе заинтересирани за стопанството, но кажаа - кога ќе го регулирате целиот процес, ќе разговараме“, рече Талески. Но, опозицијата го предупреди дека и на вториот тендер во август парцелите се нуделе по истите „грешни“ цени.

Либералдемократите, пак, на седницата на Советот, го отворија прашањето дали по 17 месеци од директорувањето со зоната, единствениот вработен во ова јавно претпријатие, директорот Трајче Котевски, има намера да понесе одговорност за неуспешноста на водењето на зоната и да си поднесе оставка. Дотолку повеќе што, според нив, Котевски е за во пензија. Од ЛДП сметаат дека три години е доволно време кој било проект, па макар тоа да е и индустриска зона, да даде резултати.

,,Дали Трајче Котевски има полни 64 години и дали ги исполнува условите за одење во пензија? Ако веќе има, не ја гледаме причината зошто и натаму да биде на чело на ЈП ‘Жабени�� - Битола. Ако ги исполнува условите за пензија, тогаш и за вас е подобро да го разрешите од функцијата директор и да го испратите во пензија за да има на кого да ја префрлите одговорноста за неуспешното раководење со проектот“, рече Валентин Груевски, советник и локален лидер на ЛДП во Битола.

И наспроти сериозноста на проблемот што го наметна опозицијата, градоначалникот Талески не се воздржа за да го пофали својот директор и да каже дека Котевски вреди колку за десетмина од неговите соработници.

,,Сакам да ве уверам, иако тоа вас не ви се допаѓа. Станува збор за еден динамичен директор на зоната кој можеби не е по желба на сите. Но, да ви кажам искрено, во него има енергија минимум за десет души. Да не беше Трајче Котевски директор, овој процес ќе беше многу поназад“, нагласи Талески. По ваквата пофалба за директорот Котевски, градоначалникот на Битола им порача на советниците од опозицијата дека ќе го одложува пензионирањето на Котевски.

„Знаете дека има законска можност градоначалникот да го продолжи рокот за пензионирање. Ќе инсистирам да се одложи неговото пензионирање зашто имаме неколку почнати процеси со него и сакам тој да ги заврши. Сто проценти верувам во него, зашто знам како работи исклучителен професионалец, кој го знае стопанството, а немаме друг таков во општината. Ако треба, по неговиот мандат ќе го земам и како советник“, рече категорично Талески.

По ваквото излагање на градоначалникот, советникот на ЛДП, Горан Милевски, јавно праша дали градоначалникот има намера Котевски да го прогласи за народен херој. Во Битола не само власта, туку и опозицијата се обидува да ја рекламира индустриската зона „Жабени“. Опозиционерите ги советуваат инвеститорите доколку патуваат на релација Битола - граничен премин Меџитлија да обрнат повеќе внимание и меѓу сончогледовите полиња во атарот на селото Жабени да ја препознаат индустриската зона. (А.Б.)