Разочарувачка слика на Камениот мост

Сигурно беа дојдени и гладни, но генералната слика не беше одраз на сиромаштија, оценуваат социолозите

Маја Томиќ

Вистински одраз на македонската социјална беда или одраз на ниската култура кај граѓаните, па со тоа беше промашена целта на манифестацијата!? На што личеше неделниот појадок на Камениот мост во Скопје, на кој беа планирани 2.000 лица, а дојдоа двојно повеќе?

Комбинација и од двете работи, генерализираат социолозите. На појадокот, замислен како настан за дружење меѓу луѓето, по примерот на повеќе западни метрополи, што треба да премине во традиција, имаше се', само не и примерно однесување од најголемиот дел присутни граѓани, кои се тепаа за понудената храна и за половина час ги испразнија чиниите.

Дали дојдоа гладните и сиромашните за да се најадат без пари или навалија љубопитните и осамени пензионери, кои сакаа да го минат денот поинаку?

„Она што се случуваше на појадокот заслужува психолошка и социолошка анализа од надлежните институции. Видовме една разочарувачка слика на лица без достоинство, без оглед дали дел од нив биле гладни и сиромашни или не. Организаторите требаше да го имаат предвид менталитетот на народот кога ја осмислувале случката. Карактеристично беше што во најголем дел беа присутни возрасните, пензионерите, кои имаат какви-такви приходи и не би можело да се каже дека се социјални случаи. Тие секогаш се први секаде каде што нешто се дели. Можеби го прават тоа поради осаменост и изолираност, па сакаат малку дружење. Секако, сигурно на појадокот имаше и сиромашни и гладни, но, сепак, мислам дека, генерално, сликата не беше одраз на гладните и на социјалците“, вели социологот Љубица Чонева.

Таа додава дека нашата нација се' уште е со пониска култура од западната кога станува збор за вакви манифестации и оти ќе треба да поминат години за вистински да се доживеат и одбележат ваквите видови случувања.

Економскиот аналитичар Ден Дончев вели дека е добра иницијативата на градските власти за оваа хумана манифестација, но самиот настан беше очигледен доказ за големиот проблем со сиромаштијата.

„Статистиката покажа стапка на сиромаштија од 31 отсто, но, реално, таа е повисока. Познато е дека стандардот на граѓаните е многу низок. И пензиите на возрасните ниту оддалеку не им обезбедуваат пристоен живот, така што не би требало да чуди што тие беа најбројни на неделниот појадок“, посочува Дончев.

Најновите статистички податоци за сиромаштијата покажаа дека 28,2 отсто од сите сиромашни во државата живеат во Скопје, а 42,3 отсто, или најголем број сиромашни се од руралните средини. Процентот на сиромаштијата во 2009 година беше 31,1 отсто, наспроти 28,7 отсто во 2008 година. Власта вели дека тоа било очекувано поради кризата. Најсиромашни и натаму се невработените и семејствата со повеќе членови. Стапката на сиромаштија кај невработените е 40,5 проценти, а дури 56,7 отсто од сиромашните се со максимум основно образование. Најсиромашни се лицата од 49 до 59 години, кои зафаќаат 56,8 отсто од вкупно сиромашните.

Според Министерството за труд и социјала, во земјава има околу 53.000 социјални домаќинства. Притоа, месечната парична помош изнесува од 2.173 до 5.300 денари, но само во првите две години. Во третата, четвртата и во петтата година се исплатуваат 70 отсто од тој износ, а по петтата година по 50 отсто. Најголем процент од социјалните домаќинства се од Скопје.

Колкумина од нив беа на неделниот појадок на Камениот мост, останува непознато. Како и да е, вистинските социјални случаи можат секогаш да се видат во народните кујни, каде што без турканици го земаат и го консумираат поделениот оброк.