Туристичко востание за повторно заживување на Крушево
Жителите настојуваат да ги задржат посетителите повеќе од еднодневен престој
Александар Пешев
КРУШЕВО - Крушевчани се подготвуваат за ново востание. Но, за разлика од востанието кое ја создаде Крушевската Република во 1903 година, овој пат тие нема никого да бркаат. Напротив, жителите на една од најатрактивните туристички локации настојуваат да ги задржат посетителите повеќе од еднодневен престој во нови и реновирани сместувачки капацитети, со понуда на тури, алтернативен туризам, планинарење и во случај на снег - скијачки спортови.
Новото туристичко востание, кое крушевчани го крстија „Крушево етноград“, ќе вклучува изработка на традиционални носии, подобрување на сместувачките капацитети и организирање разновидни активности за посетителите. Жителите на ова гратче ќе се облекуваат како комити и Турци, реконструирајќи ја атмосферата за време на Крушевското востание пред повеќе од сто години. Униформираните жители и посетители ќе се организираат во чети и, доколку се одобрат средства за овој проект, ќе парадираат на главните улици во јуни догодина. Според иницијаторот на туристичкото востание, Ранко Петровиќ од „Прима центар“, проектот нуди можност за самовработување, а инвестицијата ќе се исплати до две години.
„Ние како невладина организација, заедно со медиумите и јавните личности, не можеме сами да го имплементираме проектот. За тоа ни треба поддршка и учество на крушевчани. Најважно е сите заедно да се подготвуваме за ова востание. Битно е и целата идеја да биде поддржана од централната власт, имено од Министерството за култура“, рече Петровиќ во своето обраќање пред граѓаните.
Според него, за успешно востание е потребно реновирање на сместувачките капацитети во градот, понуда на поексклуз��вно или автентично традиционално сместување за посетителите и други содржини.
„Кога странците го посетуваат Крушево, тие се жалат дека нема што да се прави, дека нема содржина“, појасни Петровиќ.
Според проектот за туристичкото востание, жените ќе шијат традиционални носии за четниците кои ќе учествуваат во „битките“ во летната сезона. Исплатливоста на оваа инвестиција се согледува во продавање на носиите. Во проектот, исто така, се предлага понуда на кредитни линии по поволни услови за да можат крушевчани да ги реновираат или да отворат нови сместувачки капацитети во градот. Во следниве неколку години, доколку проектот наиде на поддршка од централните власти, од „Прима центар“ предвидуваат дека крушевчани ќе имаат доволно приходи за инвестирање во нови кафеани и слични објекти, а локалната самоуправа ќе има средства за инфраструктурни зафати.
„Добро е што станува збор за граѓански проект. Можам да кажам дека крушевчани имаат што да им понудат на посетителите“, вели градоначалничката на Крушево, Лефкија Гаџовска.
Крушевчани се ентузијасти за проектот.
„Мислам дека ќе успееме. Туризмот може да биде една од главните активности која може да го заживее градов“, тврди еден од жителите на Крушево.
Единствено, нешто кое се нема променето во изминативе петнаесетина години е свежиот воздух и прекрасните глетки, како и „Македониумот“. Сепак, денес Крушево остава впечаток на запуштено гратче. Старите градски куќи се запуштени со искршени прозорци и оштетени фасади, а за време на викендите улиците се празни, со само по некое отворено кафеанче и продавничка. Крушевчани се жалат дека во градот има само минувачи однадвор, додека посетители има многу малку. Од сместувачките капацитети има скромна понуда на приватно сместување во соби со заеднички кујни и бањи. Цените за сместување во мали приватни капацитети се движат од 350 до 500 денари. Во градот има отворено три приватни вили кои нудат сместување во соби со посебни кујни и бањи. Цените за престој во една ваква пристојно уредена мини- гарсониера е од 700 до 800 денари на ден. Надеж за подобра понуда за странските туристи е хотелот „Илинден“, кој беше изграден во 1949 година. По години запуштеност, објектот се реновира во ексклузивен комплекс на површина од 4.400 квадратни метри, со капацитет од 150 гости. Со понуда на затворен базен, фитнес и спа- центар и вински клуб, новите сопственици на хотелот се надеваат дека до почетокот на летната сезона во 2009 година ќе ги отворат вратите за вљубениците во ловот и алтернативниот туризам.
„Акцентот го ставаме на здравата и еколошка храна која изобилува во овој регион, како и виното и печурките“, рече еден од новите сопственици на објектот кој би требало да го задржи името „Илинден“.
Туризмот е една од најперспективните активности во која крушевчани го гледаат излезот од безработицата во која се' повеќе навлегуваат. Индустриските објекти во градот се одамна затворени. Повозрасните жители велат дека младите масовно го напуштаат градот, селејќи се во Скопје или во странство, додека повозрасните живеат од пензии.
|
