Претходен број

Груевски повторно вети силна економија

И натаму приоритети ќе бидат зголемувањето на економскиот раст и конкурентноста и вработеноста

Продолжување на реформите започнати во изминатиот период набележани како петте стратегиски приоритети се клучните цели на кои ќе се посвети Владата во новиот мандат, истакна премиерот Никола Груевски во експозето на седницата за изборот на новиот владин кабинет. Премиерот во краткото обраќање мораше да го исчита експозето со невидена брзина, поради што ниту пратениците ниту јавноста не успеаја да го следат квалитетно. Експозето, всушност, беше скратена верзија на програмата за работата на Владата во наредниот четиригодишен период.

Нагласувајќи дека пред две години од истата говорница порачал оти патот до подобриот живот и до Европа мора да се одработи, бидејќи покус пат не постои, наведе дека и натаму приоритети ќе бидат зголемувањето на економскиот раст и конкурентноста, зголемување на стапката на вработеност и пораст на животниот стандард, потоа за интеграција во НАТО и ЕУ, решавање на спорот со името врз принципот на незагрозување на националниот идентитет, продолжување на борбата со корупцијата и криминалот, спроведување на правото, одржување добри и стабилни меѓуетнички односи, имплементација на Рамковниот договор и вложување во образованието како најсигурна инвестиција во иднината.

На надворешнополитички план најави дека Владата ќе остане доследна во остварувањето на петте основни приоритети - членство во НАТО, добивање датум и започнување преговори за членство во ЕУ, укинување на визите за македонските граѓани, надминување на спорот со името и засилување на економската и јавната дипломатија. „Република Македонија ќе ги продолжи разговорите со Грција за изнаоѓање решение за наметнатиот спор и во ваквиот процес нема да прифати идеи и предлози што ќе го нарушат македонскиот национален идентитет, македонската нација и македонскиот јазик. Ние нема да дозволиме какво било решение и каков бил компромис да биде прифатен од институциите на Македонија без претходно за тоа да се изјаснат граѓаните преку референдум“, рече Груевски.

Членството во НАТО и натаму останува приоритет на новата влада, нагласи премиерот и додаде дека интензивно ќе се работи и на исполнување на критериумите и реформите на полноправно членство во ЕУ. „Во процесот на европската интеграција на Македонија целосно сме посветени и на добивање датум за преговори, почнување на преговорите за полноправно членство, со тоа што започнуваме и успешно да ги завршуваме осумте бенч-маркови или приоритети што ни ги зададе комесарот Оли Рен“, истакна премиерот Груевски.

„Во следниот период Владата ќе работи на остварување на неколку клучни цели, одржување висок економски раст од најмалку 6 отсто и на намалување на стапката на невработеност. Зголемување на домашните и странските инвестиции врз основа на подобра бизнис- клима, развој на земјоделството, подобра перспектива за младите и поголема сигурност за возрасните и пензионерите“, истакна Груевски и наведе дека се продолжува со имплементацијата на Рамковниот договор и градење меѓуетничко општество базирано на заемна почит и толеранција. (Св.У.)