Претходен број

Владејачкото мнозинство ја изгласа новата Влада

Владиниот кабинет брои 21 член, од кои најголем дел се министри од ВМРО-ДПМНЕ, дополнети од ДУИ

Светлана Унковска

Старо-новата Влада на чело со премиерот Никола Груевски, која во саботата доцна вечерта беше изгласана со 77 гласа „за“, во наредниот четиригодишен мандат ќе функционира со имиња кои во голем дел веќе им се познати на граѓаните. Покрај министрите на ВМРО-ДПМНЕ, кои беа во кабинетот и во претходниот мандат, дополнети со тројца нови од оваа партија, нови се и имињата на министрите од редовите на новиот коалиционен партнер ДУИ, кои ги зазедоа министерските места на кадрите на поранешните соработници во власта - ДПА и НСДП. Премиерот Груевски за составот на новата Влада рече дека таа е спој на младоста и искуството, но пред се' на луѓе со исклучителни вредности од кои се бара да работат чесно, транспарентно и одговорно.

На седницата за избор на Владата не дојдоа пратениците од опозицијата и практично новиот владин кабинет беше изгласан само со гласовите на парламентарното мнозинство. Поради тоа и седницата измина мирно без полемични дискусии кои беа вообичаени при изборот на претходните влади и гласањето се случи по само пет часа од нејзиниот почеток. Од галеријата изборот го следеше и дипломатскиот кор во земјава, претставници на верските заедници, како и македонскиот претседател, кого премиерот Груевски, на почетокот на своето експозе. не изостави да го поздрави со „господинот Црвенковски“. Внимание предизвика и гестот на лидерот на ДУИ, Али Ахмети, кој на крајот од својата дискусија, која беше на албански јазик, прв пат од собраниската говорница проговори и на македонски, посакувајќи и' на новата Влада и многу среќа, успех и подобра иднина.

Во новиот владин тим кој го сочинуваат 21 министер како нови кадровски решенија се министерот за здравство Бујар Османи, наедно и најмлад министер во оваа Влада, економијата ќе ја предводи Фатмир Бесими кој и порано беше на ова место, локалната самоуправа му е доверена на Муса Џафери, министер за труд и социјална политика ќе биде Џелал Бајрами, за министер за животна средина и просторно планирање е избран Неџати Јакупи - сите од ДУИ. На чело на Министерството за одбрана е Зоран Коњановски, министер за култура Елизабета Канчевска- Милевска, за образование Перо Стојановски, а новото Министерство за информатика ќе го предводи Иво Ивановски.

Своите ресори ги задржуваат сите министри на ВМРО-ДПМНЕ од претходниот владин состав. Антонио Милошоски продолжува да биде шеф на дипломатијата, Гордана Јанкулоска, министер за внатрешни работи, во Министерството за правда останува Михајло Маневски, за финансии Трајко Славески, министер за земјоделство, шумарство и водостопанство Ацо Спасеновски и министер за транспорт и врски Миле Јанакиески. Како министри без ресори се именувани Зоран Ставрески, кој останува да биде одговорен за економските прашања, поранешниот владин портпарол Ивица Боцевски сега ќе биде задолжен за евроинтеграциите, потоа Абдулаким Адеми за спроведување на Рамковниот договор, Веле Самак за странски инвестиции, Неждет Мустафа за унапредување на правата на етничките заедници а, министер без ресор ќе биде и Хади Незири.