Британија ги укинува камерите на патиштата

ЛОНДОН - Над илјада камери поставени по патиштата на Англија и на Велс за ловење на несовесните возачи што возат опасно и пребрзо се укинуваат поради штедење и намалување на трошоците во работењето што го наложи британската влада за сите министерства.

Камерите и опремата во нив што реагира, снимајќи ја табличката на возилото тогаш кога ќе открие дека некој автомобил, автобус или камион ја пречекориле дозволената брзина на определени делници, влијаеја во дисциплинирањето на возачите, затоа што со секоја фотографија на виновникот, испратена на неговата домашна адреса, стигнуваше и сметката за висока казна што мора да се плати во рок од три дена.

Сообраќајни експерти сметаат дека отстранувањето или исклучувањето на толку многу камери за ловење на пречекорената брзина од страна на возачите е погрешен и избрзан чекор на новата влада, особено што позитивното британско искуство со овој вид камери веќе го имаат прифатено повеќе земји во Европа. (МИА)