Грк загина во сообраќајка

БИТОЛА - Грчки државјанин загина во сообраќајна несреќа на излезот од Битола, а уште двајца други се полесно повредени. Несреќата се случила вчера рано изутрината околу 2 часот на магистралниот пат Битола - Меџитлија на влезот од селото Кравари, кога „фијат пунто“ со грчки таблички, управувано од 67-годишниот Андреас Самалидис удрило во паркирано комби.

Според полицискиот извештај, Гркот, кој од Битола се движел кон граничниот премин Меџитлија, со предниот дел од возилото удрил во комбе „застава 616“ сопственост на жител на селото Кравари, кое било паркирано и токму во критичниот момент сакало да се вклучи во сообраќај. Од ударот Сомалидис се здобил со тешки телесни повреди. Починал за многу кусо време откако бил пренесен во битолската болница. Неговиот сопатник, исто така, грчки државјанин на возраст од 67 години, поминал со полесни повреди. Во сообраќајката лесно е повреден и пешак, 32-годишниот битолчанец З.Н., кој случајно се нашол на местото на несреќата. Што била причината за оваа несреќа, допрва ќе се утврдува. (А.Б.)