Извештајот за Судски совет го поддржа само ВМРО-ДПМНЕ
Само владејачката ВМРО-ДПМНЕ завчера во Собранието го поддржа Годишниот извештај за работата на Судскиот совет. Овој документ наиде на жестоки критики не само од опозицијата туку и од владината ДУИ, но и од Демократскиот сојуз ( коалициски партнер на ВМРО-ДПМНЕ од коалицијата „За подобра Македонија“). Така што, по жолчна дебата во доцните попладневни часови, Извештајот на РСС беше усвоен од Собранието со 43 гласа на пратениците од ВМРО-ДПМНЕ, додека СДСМ, ЛДП, ДУИ и ДС воопшто не гласаа.
Претходно во расправата ДУИ побара Собранието да не го усвои извештајот, туку да утврди дека Советот е партизиран и не работи совесно. Интегративците остро го нападнаа претседателот на РСС, Бекир Исени, и побараа негова смена од челната позиција во Советот. Како што тврдеа, Исени „го партизирал судството,.
Како најеклатантен пример го посочија изборот на досегашниот директор на „Македонска пошта“, Садула Изаири, за судија во Тетово. „Лицето Изаири, кој како претставник на ДПА го бранеше грабежот на гласовите од последните избори пред ДИК, сега е судија.
Пратеникот од ДС, Павле Трајанов, исто така, смета дека Советот работи по партиски диктат и побара одговорност од Исени. „Предлогот врховните судии да одат во пензија на 70 години е опасен, неприфатлив и не личи таков предлог да дава претседателот на Судскиот совет“, смета Трајанов. (О.В.)
