Претходен број

Рен не споменува датум за преговори

Прогрес е направен, но не е доволен за да се пречкртаат сите осум услови, вели ЕУ

Од нашиот дописник
Слободанка Јовановска


Брисел - Европската унија се' уште не гледа во Македонија вистинска европска држава, па очекува од Владата и од сите други во државата да обезбедат соодветно функционирање на демократските институции, за да не се става и натаму под прашалник политичката стабилност на земјата.

„Сигурен сум дека правите добар прогрес и го поздравувам тоа што евроинтеграцијата е клучен приоритет на Владата. Сепак, со загриженост ги следев последните случувања. Исполнувањето на Копенхашките критериуми е основен услов за евроинтеграцијата, па затоа ја повикувам Владата да осигура соодветно функционирање на демократските институции и засилен политички дијалог“, порача еврокомесарот Оли Рен на прес-конференцијата по средбата со вицепремиерот Ивица Боцевски и министерот за надворешни работи, Антонио Милошоски, во Брисел.

Како на неопходност тој посочи на мерките што ќе осигураат дека следните избори во Македонија ќе бидат слободни и фер и дека ќе ги задоволат меѓународните стандарди, што не беше случај годинава. Еврокомесарот ни оддалеку не се обиде да ги навести шансите на Македонија до крајот на годинава да добие датум за преговори и единствено што им ветил на министрите е дека ќе се заложи за максимално објективен извештај во ноември во однос на остварувањето на осумте услови што ни се дадени и изборите како деветти.

„Има извесен прогрес во некои области, како на пример во судските реформи и околу Судскиот совет, кој функционира добро. Во однос на полициските реформи, беа именувани командири на полициските станици. Сепак, потребни се значителни натамошни напори за да можеме да ги прецртаме сите осум услови. Се надевам дека Владата ќе се зафати со преостанатите предизвици и ќе осигура стабилност, за земјата да оствари сериозен прогрес и следен чекор кон ЕУ“, оцени Рен.

Одговарајќи на новинарско прашање во кој од осумте услови на ЕУ Македонија покажува послаби резултати, Рен практично посочи неколку како суштински, од судските реформи, борбата против корупцијата, политичката стабилност и слободните и фер избори, како суштински нешта за создавање вистинско европско општество и европски начин на живеење во Македонија.

„Моето искуство на оваа функција ми покажа дека е потребен извесен степен на консензус околу евроинтеграцијата. Политичката стабилност се очекува од земја- кандидат за членство“, беше објаснувањето на Рен.

Според него, одговорност на сите кои сакаат да добиеме датум за преговори за членство е да се постигне таа стабилност, а Владата, парламентот и судството имаат посебна одговорност да обе��бедат системски услови за слободни и фер избори.

Ваквото инсистирање на Рен да ги врати настаните до изборите, двајцата министри го протолкуваа со реченицата дека Брисел само што се вратил од одмор, па многу од позитивните случувања во Македонија туку не се знаат. На интересирањето на Рен како се одвива политичкиот дијалог во Македонија, Милошески и Боцевски го спомнале како илустрација донесувањето на Законот за јазиците, за кој десет години претходно немало клима во земјата, а сега бил договорен и изгласан со огромно мнозинство и за два месеца.

Разногласието меѓу претседателот и премиерот, според нив, е нормално во демократијата и такво нешто нема само во Белорусија. Околу изборите Боцевски кажа дека е поведена судска постапка против 70 лица и дека за нив е побарана итна процедура.

И Милошоски и Боцевски не навлегуваа во процени каква ќе биде одлуката на Европскиот совет во декември за Македонија, иако изразија очекување дека оценката во извештајот ќе биде позитивна. Според Боцевски, Македонија остварила 75 отсто од барањата во осумте услови, а остварувањето на преостанатите 25 отсто е во тек. „Имаме силен партнер и консултант во ЕУ“, тврдеше тој, напомнувајќи дека ја добил ќерката кога Македонија доби кандидатски статус, па се надева дека кога ќе тргне на училиште ќе поминеме барем половина од преговорите со ЕУ“. На тоа Рен шеговито реплицираше со зборовите:„А, кога кај вас децата тргнуваат на училиште?“

Двајцата министри имаа средба и со еврокомесарот за правда, Жак Баро, кој оценил дека во истварувањето на условите за укинување на визите, Македонија отишла најдалеку во регионот. Според Боцевски, Македонија остварила и повеќе, односно ги остварила сите услови, па очекувањето во Владата е до крајот на годината ЕК да донесе политичка одлука за укинување на визниот режим и таа да се потврди од лидерите.

На средбата, иако најсуштинско и најургентно, Рен не го отвори спорот околу името со Грција, а не беше расположен ниту да одговара на тоа прашање, бидејќи ЕУ кажа што имаше да каже и сега епилогот ни го препушта нам и на Атина. Затоа, пак, Боцевски ја искористи приликата да каже дека Македонија е многу конструктивна и активна во преговорите, но дека за танго треба двајца, а Грција, наспроти приемот што го имаше Метју Нимиц во Скопје со највисоки претставници, не му дала можност ниту да дојде во Атина.

Без оглед на пораките од Брисел и атмосферата околу проширувањето во ЕУ, покрај спорот околу името кој никако да се реши, министрите известија дека во буџетот за идната година првпат ќе се издвојат средства за водење преговори со Европската унија.Треба само оптимизмот да го сподели и другата, европска страна, која очигледно не ги реактуализира изборите тукутака.