„Постојниот Кајак кану-клуб во Градскиот парк ќе стане втор Кинески ѕид. Тука ќе никнат угостителски објект, хотел, базени, тениски игралишта и други придружни содржини“, предупреди на вчерашната седница на Советот на Карпош советникот Ранко Петровиќ.

Пред мнозинството советници да даде зелено светло за ДУП „Централен градски парк - блок 2“, Петровиќ истакна оти е убеден дека планот дозволува во иднина на местото на Кајак кану-клубот да се отвори простор за изградба на 36-катница. Сепак, Советот го одобри планот. Градоначалникот на Карпош, Стевчо Јакимовски, категорично изјави оти планот единствено ја потврдува сегашната висина и површина на објектот од приземје со потпокрив.

„Со Генералниот урбанистички план е утврдена намената на објектот и ние не можеме да одиме против него. Во објектот има 12 соби и тие ќе се користат за потребите на кајакарите, нема да имаат никаква комерцијална намена. Живееме во 21 век, зар овие луѓе се' уште да работат во мизерни услови какви што сега ги имаат. Со овој ДУП само им даваме можност да го реновираат објектот во постојните граници“, рече Јакимовски. (Дс.Т.)