„Водовод“ ги менува азбестно-цементните цевки

Јавното претпријатие „Водовод и канализација“ ја продолжи акцијата за замена на азбестно-цементните цевки. Од вкупно 80 километри цевки, годинава ќе бидат заменети 18 километри. Ова е двојно повеќе од лани, кога беа заменети цевки од мрежата во населбите Кисела Вода, Пржино и Ѓорче Петров. Претпријатието годинава за оваа намена издвои 100 милиони денари.

Од „Водовод и канализација“ велат дека моментално се работи во населбата Горно Лисиче. На улицата „Јужноморавски бригади“ се довршува мрежа во должина од околу три километри, а завршуваат и зафатите на улицата „Палмиро Тољати“. Овие зафати се последните што ги реализираат фирмите кои беа избрани на минатиот тендер.

Злате Икономов, директор на техничкиот сектор во „Водовод и канализација“, вели дека на новиот тендер пред десетина дена биле одбрани пет нови фирми, кои деновиве ќе почнат да работат на замена на азбесно-цементни цевки во сите десет општини во Скопје. Од претпријатието додаваат дека ќе се работи по малку во сите општини, а дел од проектите веќе се реализирани во населбите Средно Нерези и во Горно Лисиче и тоа на улицата „Горноврановска“. Менувани се цевки и во Чаир, на улиците „Вергино“, „Зеф Љуш Марку“, „Албанска бригада“ и околните улички. Извршена е замена на старите цевки и во делот на населбата Керамидница во општината Гази Баба, како и во општината Центар. (Сн.К.)