Насловна

Политичари ќе висат на зградата на МНР за 1,8 милиони евра

Меѓу светските политичари, чии скулптури ќе бидат високи меѓу 2,5 и 3 метри, ќе бидат Линколн и Черчил, наши нема да има

Деспина Трајковска



Триметарски скулптури на светски политичари ќе ја красат фасадата на новата зграда на Министерството за надворешни работи. Линколн и Черчил ќе бидат едни од десетиците ликови што симболично ќе „висат“ на зградата во која ќе биде сместена администрацијата, а ќе наминуваат и дипломати. Скулптури на македонски политичари наводно нема да има, но зошто, надлежните се без конкретен одговор. За разиграната фасада на седумкатницата ќе се потрошат околу 1,8 милиони евра, а за реализација на планираното задолжени ќе биде „Бетон“ кој е и главен изведувач на објектот.

Васил Доневски, директор на владината Служба за општи и заеднички работи која е потписник речиси на сите зделки за новите административни објекти, вели дека надворешниот изглед на зградата не е новина во проектот, ниту, пак, е нешто невообичаено. Фасадата е дел од идејното решение за објектот на МНР, чии автори се Лидија и Благоја Стојановски. Според Доневски, декорациите ќе бидат изведени од различни материјали, од лиен бетон техника „сто“ за која генерално се употребува природен камен, потоа мермер, бронза...

„Комбинацијата на предвидените декорации на фасадата уште од сега, само на хартија гарантираат дека објектот ќе биде навистина впечатлив и ќе ‘зрачи‘ со голема симболика. Освен планираните скулптури на светските политичари, чија висина ќе се движи помеѓу 2,5 и 3 метри, надворешноста на зградата ќе ја красат и капители, тимпанони, како и еден вид скулптури на кои ќе бидат претставени македонски народни носии. Планирани се 60 скулптури и само мал дел од нив нема да бидат со ликови на политичари“, објаснува Доневски кој не се сомнева дека фасадата ќе биде изведена навремено и беспрекорно, иако има замислен сложен изглед.

Директорот е задоволен од досегашната динамика на изградба и вели дека засега не постојат пречки администрацијата на МНР да се всели во новите работни простории до крајот на годинава. Всушност, и „Бетон“ кој ја гради зградата за 13,5 милиони евра има обврска да го предаде клучот до крајот на ноември.

Според проектот, објектот ќе има седум ката и стилска фасада, а вработените ќе можат да се паркираат во подземен паркинг на две нивоа, за кој наскоро треба да се избере изведувач. Со вселувањето администрацијата на МНР, конечно, ќе добие сопствена постојана адреса. Неколкугодишното потстанарство во повеќе објекти низ градов и високите кирии беа една од причините зошто Владата одлучи на МНР да му изгради сопствена зграда, која е дел од „Скопје 2014“.