Поглед

Убијте го „Викиликс“

Димитар Чулев

Неверојатно: американски конгресмен побара газдата на „Викиликс“ да биде прогласен за терорист, советник на канадскиот премиер бара да му испратат наведена ракета, а Обама да го ставел „под договор“ за ликвидирање (стил практикуван од мафијата); некој побара „Викиликс“ да биде третиран како Ал Каеда, Интерпол издаде потерница...

Ако Џулијан Асанж имал намера да биде еден вид модерен Робин Худ, кој краде фајлови од моќните за да ги лиферува на послабите и да ги запознае со тоа што мисли Вашингтон за остатокот од светот, дефинитивно, погрешил. Произлезе дека не се битни страшните вистини и пикантериите што излегоа на површина – сега е приоритетно да се да се убие гласникот.

Ахмадинеџад не е навреден што САД ги подбуцнувале арапските земји да го нападнат Иран, Путин не мисли дека е штетно што американски дипломати ја нарекуваат Русија мафијашка држава, никој не се стресе што авганистански потпретседател бил фатен со 52 милиона долари во личен багаж, Германија не се лути што канцеларката ја нарекуваат „тефлон-дама“ (можеби асоцијација на готвачка)... Бан Ки-Мун не изусти ни збор осуда што му провалиле во личното и во обезбедувањето на ОН што е првокласен скандал: дали тоа некој имал „планови“ за генералниот секретар?

Политиката е комплексна игра со нечисти правила и речиси комично изгледаат обидите на владите да ги маргинализираат податоците од веб-страницата. Зашто, во она што го пушти во оптек и што дополнително ќе го објавува „непријателот бр. 1“ по кој тргнаа ловците на глави од сите меридијани, богами има стенограми и размена на мислења со американски дипломати од кои се гледа кој на кого сакал да му копа дупка.

Затоа, најдобро е да се убие „Викиликс“ и прашината да спадне.