Црвенковски: Маршот не е за одбрана на Рамковски

Шефот на опозицијата ги демантира тврдењата
дека СДСМ на неделниот марш насилно ќе влегува
во институциите

Намерата на протестниот марш инициран од СДСМ не е ниту одбрана на Велија Рамковски ниту насилно влегување во институциите, порача Бранко Црвенковски. Со ова директно ги демантираше тезите дека такви биле намерите на организаторите на неделниот марш низ скопските улици.

Црвенковски е дециден: „СДСМ ниту го штити Велија Рамковски ниту стои зад него. Ако овој човек го прекршил законот, треба и мора да одговара. Уште повеќе, ние во СДСМ ги повикуваме институциите се' да проверат и доколку низ законска процедура се докаже каков било криминал, инсистираме господинот Рамковски да биде соодветно казнет“. Со тоа, рече, завршуваат со нивниот однос кон Рамковски и со грубата и глупа манипулација на власта.

Сепак, нагласи Црвенковски, СДСМ реагирал и ќе реагира секогаш кога се гази демократијата во државата, а еден од носечките столбови на демократијата се токму медиумите и слободата на јавно изразување. Тој потенцира дека А1, „Шпиц“, „Време“ и „Коха е ре“ се многу повеќе од Велија Рамковски. „Критиките кон власта се неопходни во демократско општество, а не зло што треба да се елиминира. Очигледно е дека Груевски и фамилијата или не можат или не сакаат да го разберат тоа“.

Што се однесува до тезите дека зад маршот се крие идејата за наводно насилно влегување во институциите на државата, шефот на СДСМ рече дека тука се поставуваат две прашања - дали можат или дали сакаат да го сторат тоа? Според Црвенковски, тие го можат тоа, но нема да го направат, меѓутоа, и' порача на власта дека кога на едно место ќе се соберат 40.000 или 50.000 луѓе, тоа не е ниту група, ниту толпа, туку народ. А тогаш не постои кордон полицајци што тоа би можел да го запре дотолку повеќе што 90 отсто од тие полицајци се чесни и за бедна плата ја извршуваат својата тешка работа.

„СДСМ како одговорна партија точно знае што е добро, а што не е за државата, па затоа битката на народот за заминување на оваа власт ќе ја водат низ институциите на системот“, рече лидерот на опозицијата. Тој потсети дека неделниот протестен марш е за достоинството на народот, за негова слобода, за правото на подобар живот...

Прашан како ги коментира заканите од Австралија за негова ликвидација, Црвенковски рече дека наполно е свесен за ризикот од работата што ја води, но ова што го почнал и ќе го заврши. Нема да поднесе пријава против заканувачот, но праша дали Груевски ја поднел пријавата против млекарот Душко, кој не му се закани, туку го навреди, или тоа во негово име го сториле институциите на државата. Не исклучи провокации од власта на неделниот собир, меѓутоа побара од МВР да ја врши работата согласно со законите. (Б.Ј.)