Фуере бара Мендела во Македонија

Македонија станува општество во кое луѓето се плашат да зборуваат, предупреди евроамбасадорот

Слободанка Јовановска


Какво огромно губење време е кога навредуваат политичарите тука. За тоа ли ги избравте? Се сомневам!

Со овие зборови амбасадорот Ерван Фуере им возврати вчера на владините пратеници и на ним блиските медиуми, чии напади и навреди кулминираа минатата недела. Тие напади, рече тој, се болни за мене и покажуваат дека политиката тука многу се персонализира, дека постои одмаздољубивост и сето тоа вознемирува. Притоа тој проговори за темата што полека испливува во Македонија т.е. за стравот на граѓаните отворено да зборуваат, несвојствено за демократски општества.

„Тоа, исто така, одразува постоење на страв во општеството. Луѓето се плашат да зборуваат отворено и тоа е крајно сериозно за иднината на земјата. Се надевам дека еден ден одмаздливоста, што е присутна во политичкиот говор, ќе биде елиминирана и дека луѓето ќе работат заедно во духот на консензус, бидејќи тоа е единствен начин за напредок“, рече Фуере, па посочи на омилениот пример, Нелсон Мендела.

Прашан дали, откако се извини, во идните извештаи на ЕК ќе стои македонски јазик место државен, амбасадорот ја префрли топката во ОН, а делумно и на нашата Влада.

„Жално е што се случуваат вакви нешта, но ОН ја коригираа ситуацијата, а ние ги следиме нивните насоки. ЕУ не менува идентитети на луѓето. Напротив, силата на ЕУ е во различноста што постои во неа и ние ги почитуваме различните идентитети. Сепак, не е коректно да се злоупотребува концептот на идентитетот за политичко-партиски и домашни цели. Тоа создава емоции за нешто што не треба, што е свето за секого и што не е предмет на преговори. Жалам што некогаш има обиди за политизирање на идентитет со мотиви што немаат никаква врска со него. Се надевам дека дебатата за ова ќе се води на порационален начин и оти ќе се фокусираме на клучните прашања во извештајот за напредокот“, рече Фуере. Тој забележа дека истиот термин „државен јазик“ се користел и во минатогодишниот извештај за Македонија, но оти тогаш немало реакции.

„За нас државниот јазик е македонскиот јазик. Можеби за 20 години и албанскиот ќе биде, исто така, или српскиот, ромскиот. Во Јужна Африка постојат 11 официјални јазици со кои се признаат сите различни етнички заедници. Тоа може и тука да биде, да има два, три, или пет јазици“, рече Фуере. Индиректно тој ја искритикува власта за нападните прес-конференции со кои сака да ја убеди јавноста како да го чита извештајот на ЕК. Според него, ЕК веќе 15 години применува исти критериуми за сите држави во извештаите и многу ретко некоја од нив ги доведувала во прашање неговите оцени, па затоа разочарувачки е да се види дебатата што се води овде.

„Тоа не е школски учебник или испит. Тоа е водич за Владата да се фокусира на реформите што се од суштествено значење. Ќе биде жално ако се минимизираат слабостите. Напротив, силата на секоја земја е да прифати дека има слабости, дека недостигаат реформи и да работи на нив, а не да се обиде да ги скрие“, рече Фуере. Генерално, тој рече дека добива многу петиции од индивидуални бизнисмени, кои се жалат на пречките на кои наидуваат, повикувајќи ја власта да создаде одредено ниво на фер плеј за економските актери, бидејќи вака, само со маркетинг-кампањи, не се постигнува ништо.