Груевски го извиси Жозеф Дол

Премиерот Никола Груевски вчера не се појави на прес-конференцијата на лидерот на европските народни партии Жозеф Дол во Европскиот парламент со образложение дека за неа не се ни пријавил, иако беше одамна договорена и најавена од групата на европските партии во Брисел. Портпаролите на Дол соопштија дека за откажувањето дознале пред прес-конференцијата, која и' претходеше на дебатата за Балканот организирана за да му помогне на регионот да се врати на агендата на ЕУ.

Неофицијално, во ЕП шпекулираат дека Груевски немал храброст да се појави пред новинари што не ги контролира, по лошото искуство од последната посета на Брисел кога беше прашан за контроверзниот проект „Скопје 2014“.

Портпаролот на Владата, Мартин Мартиновски, изјави дека во согласност со нивната агенда, не било воопшто планирано премиерот да се обрати на прес-конференцијата, иако неговото име остана да стои на снимката на интерната ТВ и откако беше завршена. Место тоа, Груевски имал директна средба со лидерот на групата на европските партии, Дол, како и со претседателот на ЕП, Јиржи Бузек, и со други европарламентарци. Според него, премиерот му е благодарен на Дол за организирањето на балканската конференција на која учествуваа и претседателот и премиерот на Албанија, шефот на дипломатијата на Хрватска, функционери од Косово, од Унгарија и од БиХ, а отсуствуваа Србија и Црна Гора како знак за бојкот поради истиот третман на Приштина. На прес-конференцијата Груевски требаше да се појави со Сали Бериша и со хрватскиот шеф на дипломатијата, Гордан Јандроковиќ. (Н.Р.)