Странците за новиот изглед на Скопје

Еминентните австриски архитекти, Ерих Рајт и Кристоф Луксингер, професори на Институтот за урбанизам на Техничкиот универзитет во Виена, велат дека планот „Скопје 2014“ има просторни проблеми, бидејќи со него се уништуваат постојни простори, кои имаат огромни ненадоместливи квалитети. Но, според нив, проектот за Скопје има и една друга димензија, а тоа е емитацијата на стар, одамна изумрен стил, наспроти модерната футуристичка архитектура што денес се планира во светот. Како што изјави архитектот Ерих Рајт за „Утрински“, отсликувањето на антиквизацијата во сите новоизградени објекти нема никаква порака.

„Архитектурата што се предлага со ’Скопје 2014‘ сигурно не е продукт на демократија и на тоа дека народот што живее во градот има силна потреба од ваков израз. Мене веднаш ми беше јасно дека тоа е најверојатно процес што почнал одозгора, иако архитектурата почнува одоздола. Таа е процес за кој секогаш треба јавно мислење, дискусии, дебати за да се дојде до процес што ќе заврши горе. За жал, овој процес е почнат од горе и ќе заврши долу“, рече професорот Рајт.

Дека проектот за Скопје во 2014 не е репрезент на она што се случува денеска, се согласува и архитектот Антониот Петров, кој моментално на Харвард предава неколку предмети од областа на урбанизмот и архитектурата. Тој смета дека во овој проект се отсликува начинот на кој политичарите се однесуваат кон градот.

„Но, мора и граѓаните да се преиспитаат сами за да научат како да се движат натаму, се' со цел да може да се гледаат предностите на општеството, а не само нечии лични идеи“, вели Петров. (Б.А.)