Старделов: Бесмислено е додавки на името

Охрид – „МАНУ не расправал и нема изградено став во врска со последните предлози за решавање на спорот за името што беа спомнувани во последно време во медиумите“, изјави во Охрид претседателот на Академијата, Георги Старделов.

„Не сме дискутирале за ова прашање, но, како Македонска академија и како наука, во континуитет баравме решение за овој спор и бевме уверени дека она што не смее да биде изменето во нашето име е Република Македонија“, рече Старделов, одговарајќи на новинарско прашање каков е ставот на МАНУ за предлогот Република Македонија - Вардар. Според него, прашање што треба да го решат политичарите, а не науката, е тоа дали во името ќе стои и нешто друго. 

„Науката знае само за едно, дека сме тоа што сме со милениуми и е наполно бесмислено од гледна точка на науката да предлагаме измени, некои додавки или не знам уште какви други решенија што би биле логични во политиката, бидејќи политиката е сфера на компромисот, а во науката компромисот нема значење“, истакна Старделов.

Во врска со пишувањата дека нема атмосфера за создавање нова енциклопедија, Старделов со став дека тие немаат никаква основа. „Сета работа се одвива според одлуките на Собранието на МАНУ. Формирана е нова редакција која веќе заседава и таа треба да изработи еден концепт, кој донекаде е изработен. Главниот уредник подготви текст кој има над 50 страници и во кој се сумираат ставовите и погледите на нашата редакција за тоа како да изгледа македонската енциклопедија во нејзиното понатамошно работење. Сега се слушаат секакви муабети, но тие немаат никаква основа“, рече Старделов.

Тој очекува во септември или најдоцна во октомври да заседава Собранието на МАНУ, кое ќе ја разгледа новата концепција и предлогот на редакцијата за сегашната енциклопедија.

„Уверен сум дека по Годишното собрание што го имавме пред извесно време, создадовме нова атмосфера во Академијата. Во таа смисла не може да се очекува никакво недоразбирање и никакви спорни решенија. Ќе настојуваме во границите на нашите можности да дадеме се' за да создадеме од овој простор духовно место во кое ќе проникнуваат сите културни процеси и тенденции, сите процеси на етничките заедници“, рече претседателот на МАНУ. (МИА)