Владата нема да го запре „Скопје 2014“

Доколку се' се одвива во законски рамки, целата постапка за нов ДУП би траела шест месеци

Деспина Трајковска


Одлуката на Уставен суд не го запира проектот „Скопје 2014“. Премиерот Никола Груевски вчера изјави дека не очекува застој во изградбата, оти за најголем дел од нив веќе биле обезбедени градежни дозволи.

Иако последните измени на ДУП „Мал ринг“ судот ги оцени како неуставни, сепак, веројатно, ќе биде изградено речиси се' што предвидува планот. Според урбанистите, недореченостите во македонските закони даваат простор проектот да тече и натаму, иако се заснова врз незаконски документ. Пресуден е временскиот период во кој биле извадени дозволите со кои се обезбедува непречена градба.

Одобрение за градба веќе поседува контроверзната триумфална порта. Тоа вчера го потврди министерката за култура, Елизабета Канческа-Милеска, која за Радио Слободна Европа изјави дека независно од случајот, портата ќе продолжи да се гради, бидејќи за објектот Министерството обезбедило градежна дозвола пред одлуката на уставните судии.

Колку од останатите 19 објекти што беа предвидени со незаконитите измени на ДУП „Мал Ринг“ имаат градежни дозволи, нема точни податоци. За оние градби од владиниот проект што немаат градежни дозволи, ќе треба да помине најмалку половина година за да добијат законска основа за реализација. Меѓу нив се барокната катна гаража, скулптурите на мостот „Око“, колонадата на левиот брег на Вардар, спомениците во паркот „Жена-борец“ и уште низа други.

Урбанистите коментираат дека по одлуката на Уставниот суд за поништување на последните интервенции во ДУП „Мал ринг“, општинарите од Центар ќе треба да се испотат за владините визии за „Скопје 2014“ да ги стават во законска рамка. Во спротивно, изградбата не смее да стартува. Но, очигледно тоа ќе важи само за оние за кои власта досега не успеала да ја обезбеди дозволата за градба.

Со оглед на тоа дека станува збор за владин приоритетен проект, иако според последната анкета на ИРИ, дури 66 отсто од граѓаните се против „Скопје 2014“, повеќе од сигурно е оти надлежните ќе донесат нов ДУП, со кој докрај ќе си ја реализираат замислата за новиот изглед на главниот град.

Иако случајот е топ-тема во јавноста, одговорните од Општината Центар не сакаат ништо да коментираат, зашто, како што велат, станувало збор за судска одлука. Градоначалникот Владимир Тодоровиќ, кој е предлагач на сите ДУП-ови, е на одмор.

Урбанистите велат дека од моментот кога Тодоровиќ ќе ја иницира постапката, најмалку шест месеци, под претпоставка да нема непредвидени административни проблеми, ќе траат сите потребни филтрирања на планот. Прво, партиципативното тело за урбанизам треба да ги разгледа предложените измени, потоа планот во нацрт-верзија треба да мине низ општинскиот Совет, по што е неопходно да се распише јавна анкета, што значи предложениот ДУП треба да биде на увид на граѓаните 15 дена. Под претпоставка да нема ниту една забелешка од јавноста, за максимум еден месец планот како предлог, односно во финална верзија се проследува на одобрување на Советот на Центар. Во меѓувреме, за ДУП-от треба да се обезбедат мислења од Министерството за транспорт и врски и од Градот Скопје. Според урбанистите, докажано од досегашната практика, целата оваа постапка трае најмалку шест месеци.

Одлуката на уставните судии беше повод вчера да се огласат опозициската СДСМ и граѓанското Здружение „Плоштад слобода“, кои во континуитет во изминативе две години укажуваат оти урбанистичките прекројувања на центарот на Скопје се незаконски.

„Проектот ’Скопје 2014‘ е бесмислен проект на кој се трошат повеќе од 200 милиони евра народни пари, а по одлуката на Уставниот суд, очигледно е дека има и многу процедурални и законски отстапувања. Веројатно и затоа расправата околу тоа не ја ставаат на дневен ред во Собранието“, изјави вчера Андреј Петров, секретарот на опозиционерите.

Од „Плоштад слобода“, пак, сметаат дека со судската одлука се потврдиле нивните укажувања дека владиниот урбанистички проект се води незаконски, тајно и зад грбот на јавноста и граѓаните на Скопје.

„Затоа би сакале да ја повикаме Општина Центар при очекуваните повторни измени на ДУП-от да не го заобиколува мислењето

на жителите од Општина Центар, како и на целата јавност, туку да ги отвори вратите за коментари, критики и сугестии“, потенцираа вчера од граѓанското здружение.