ЈСП ќе воведе автобуска линија Скопје - „Александар Велики“

Се разгледуваат две опции, сопствена редовна линија со утврден возен ред или заедно со ТАВ

ЈСП „Скопје“ до лето ќе воведе автобуска линија до аеродромот „Александар Велики“, изјавуваат од претпријатието. Советот на Скопје на последната седница го задолжи своето претпријатие да ги разгледа сите можности и да најде начин на сите патници да им обезбеди соодветен превоз. Засега се разгледуваат две опции, а која ќе се избере зависи од исходот на состанокот меѓу претставниците на турскиот концесионер ТАВ и на ЈСП.

Како што не' информирапе директорот на ЈСП, Мишо Николов, автобуската линија до аеродромот може да биде редовна или повремена. Доколку е редовна ќе сообраќа со утврден возен ред на релацијата Скопје - аеродром, преку селата Петровец и ‘Ржаничино, бидејќи ЈСП не смее да вози по автопат. Доколку, пак, ТАВ покаже заинтересираност за превоз на патници до аеродромот, тогаш со јавното претпријатие дополнително ќе ги утврдат термините за поаѓање на автобусите. Веројатно локација за тргнување на патниците кон аеродромот „Александар Велики“ ќе бидат поголемите хотели во градот „Александар палас“, „Холидеј ин“ и „Континентал“.

„Засега има две опции, а ЈСП со мала организација може да се приспособи да ги организира и двете. Се' зависи од ТАВ, од тоа дали ќе сака превоз на патници до аеродромот и, секако, дали ќе сака да работи со ЈСП или со друг превозник. Доколку, пак, се избере опцијата да се воведе редовна линија преку селата до аеродромот, ЈСП поседува соодветни автобуси за сместување на патници со багаж. Проблематично ќе биде само времето на патување, што можеби ќе трае и повеќе од 45 минути“, вели Николов.

Тој објаснува дека за сите новини во врска со линијата кон аеродромот ќе го информира и Советот на Скопје на една од наредните седници. (С.Н.)