Недисциплината во зонското паркирање се казнува со „лисици“

Ако и по еден час од блокадата граѓанинот не ја плати казната, ќе реагира „пајакот“, кој чини плус 2.000 денари

Деспина Трајковска

Возилата кои не ги почитуваат правилата на зонското паркирање ќе бидат блокирани со „лисици“. ЈП „Градски паркинг“ од вчера почна со оваа мерка со цел да оствари поефикасна наплата на казните за недисциплинираните корисници на паркиралиштата на кои важи зонскиот систем на наплата.

Панче Стојановски, директор на „Градски паркинг“, објаснува дека досега наплатата на пеналите не се покажала како ефикасна, бидејќи граѓаните не ги плаќале веднаш казните, па од претпријатието биле принудени да поведуваат судски постапки кои често траат и по неколку месеци. Сега со механизмот на „лисици“ ќе се гарантирало намирувањето на обврските за користење паркинг-простор.

„Доколку по еден час од блокирањето на возилото сопственикот не плати за паркирањето, ќе реагира Пајак-службата и возилото ќе се однесе во депо. Нормално дека секој веднаш ќе ги плати потребните трошоци да му биде вратена за колата. Оваа мерка е докажана како ефикасна во многу земји и затоа сме убедени дека ќе функционира и кај нас. Инаку ‘лисиците‘ нема да ги наплаќаме дополнително. Всушност, тие ќе се компензираат со наплатата на казната“, вели Стојановски.

„Лисици“ ќе се закачуваат на секое возило чиј сопственик не платил за користеното зонско паркирање, го пречекорил дозволеното време за паркирање или, пак, се паркирал на несоодветно место, на пример, на местата резервирани за инвалиди. Освен со „лисици“ на предното тркало на возилото од страната на возачот, недисциплинираните граѓани за казната ќе бидат информирани и со налепница на шофершајбната.

Од ЈП „Градски паркинг“ посочуваат дека доколку и по еден час од блокадата на возилото граѓанинот не ја намири казната, „пајак“ ќе го однесе возилото во депото на претпријатието. Со тоа, автоматски, освен казната за непочитување на правилата за зонско паркирање, која изнесува 1.300 денари доколку не е платено за паркирање, или е пречекорено дозволеното време, а 3.000 денари ако колата е паркирана на несоодветно место, нејзиниот сопственик ќе треба да плати и дополнителни 2.000 денари за „пајакот“.

Засега, „Градски паркинг“ располага со 50 механизми на „лисици“, а наскоро планира да набави уште толку. „Лисиците“ ќе се користат исклучиво на паркиралиштата каде што важи зонскиот систем на наплата, бидејќи на обичните паркинзи плаќањето се регулира со наплатна рампа.