Девојчиња ги вакцинираат на препад против ХПВ

Родителите се жалат дека без да ги информираат за која вакцина станува збор, им ги вакцинираат децата

Јасмина Јовановска

Девојчиња на 11 и 12-годишна возраст ги вакцинирале против ХПВ вирусот на препад. Ова се случува во некои основни училишта во земјава. Родителите се жалат дека без да ги информираат за која вакцина станува збор, им ги вакцинираат децата во училиштата.

„Како не им се срам да се служат со манипулации за да ни ги вакцинираат децата. Дали на овој начин државата сака побрзо да ги потроши вакцините за да не завршат на буниште“, прашува еден револтиран татко од Берово, кој тврди дека неговата 12-годишна ќерка ја вакцинирале против ХПВ вирусот без да го информираат од училиштето за видот на вакцината. „Здравствената екипа влегла ненадејно на час и сите присутни девојчиња биле вакцинирани“, раскажува таткото, чија ќерка е ученичка во училиштето „Дедо Иљо Малешевски“ во Берово. Децата, чии родители дознале со која вакцина ќе се вакцинираат, намерно не биле пуштени на училиште, за да ја прескокнат вакцинацијата. Некои, пак, се снашле правдајќи дека се болни.

Од беровското училиште велат дека нема никакви манипулации со ХПВ вакцинацијата. „Од Здравствениот дом имаше јавно известување за вакцинацијата кое беше закачено на огласната табла во училиштето. Некој што си направил своја слика за вакцинацијата е друга работа“, објаснува Кире Стоилковски, директор на основното училиште „Дедо Иљо Малешевски“ во Берово.

На нашата реакција дека не е доволно јавното известување и дека е незаконски децата да се вакцинираат без да знаат родителите, директорот се потсети на деновите на вакцинацијата што биле пред дваесетина дена и рече: „На децата им беше кажано да ги информираат домашните дека ќе се вакцинираат и да дојдат со еден од родителите. Може некое дете заборавило да пренесе“, се оправда Стоилковски. Според него, ако некој родител не сакал да го вакцинира детето, тоа ќе го почитувале, без разлика што вакцината против ХПВ вирусот е задолжителна, на која инсистира Министерството за здравство и е дел од календарот за редовна вакцинација.

„Министерството за здравство мора да работи и да притиска, но родителот ако не сака да се вакцинира, детето не може сосила да го натераме, изборот за вакцинирања е нивен“, истакнува Стоилковски. Но, тој не објасни дали родителите биле информирани за која вакцина станува збор.

И во Министерството за здравство велат дека децата не се вакцинираат без најава. „Директорката на Центарот за јавно здравје во Берово информира дека една недела претходно за сите вакцини го информира директорот на училиштето, а децата се информирани од страна на класните раководители за вакцинирање со редовните вакцини“, објаснуваат од Секторот за превентивна заштита при Министерството за здравство. Оттаму уште велат дека е доволно тоа што децата со себе мора да ги понесат здравствените книшки. „На денот на вакцинација децата со себе носат и здравствени книшки и со самото тоа родителите се претходно информирани дека тој ден се врши вакцинација“, објаснуваат од Министерството за здравство од каде што додаваат дека ниту едно дете ниту, пак, родител се нема пожалено за начинот на информирање за вакцинирањето. Од Министерството за здравство уште се пофалија дека во овој регион имаат успешна вакцинација од околу 95 отсто опфат на девојчињата. А дали родителите знаат со која вакцина се вакцинираат нивните деца или, пак, се вели дека тоа е редовна вакцинација, никој не одговори во Министерството за здравство.