Сорос му понудил помош на Груевски

Македонскиот премиер Никола Груевски во Прага се сретна со основачот и претседавач на Фондациите отворено општество, Џорџ Сорос. Средбата се случила на маргините на состанокот на Меѓународното раководно тело на кој нашата земја го презеде претседавањето со Декадата на Ромите од Чешка. Груевски на средбата, како што писмено се информира прес-службата на Владата, го информирал Сорос за активностите за социјална инклузија на Ромите во Македонија во образованието, во областа на домување, вработувањето и здравството. Сорос му понудил на Груевски поддршка за полесен и побрз пристап на Македонија до фондовите на ЕУ за прашања што се поврзани со социјалната инклузија на Ромите во општеството и генерално во однос на спроведувањето на активностите од Декадата на Ромите. За тоа Фондацијата е подготвена да даде помош при организирање иницијален состанок во Брисел до крајот на годината, на кој би учествувале и еврокомесарите што располагаат со соодветни финансиски средства за оваа намена. На тој состанок би се дефинирал буџетот на кој Македонија би можела да смета во текот на претседавањето со Дек��дата на Ромите.

Двајцата соговорници заклучиле дека комуникацијата меѓу Владата и Фондациите отворено општество ќе продолжи на оперативно ниво со цел реализација на предвидените активности на планот на поефикасно претседавање на Македонија со Декадата на Ромите. (Н.Р.)